د تېر جمهوري نظام د کورنیو چارو پخواني وزیر علياحمد جلالي د افغانستان اوسنی وضعیت کړکېچن بللی او د هغه په خبره، هغه رژیمونه چې د ځان د بقا لپاره وحشت خپروي، هېڅکله دوام نهشي کولای. هغه زیاتوي، چې طالبان په ۲۱مه پېړۍ کې ژوند کوي، خو چلند یې د ۷مې پېړۍ له زمانې سره ورته دی.
علياحمد جلالي د جمعې په ورځ (د زمري ۲۳مه) له افغانستان انټرنشنل سره په یوې مرکه کې زیاته کړې، هېڅوک نهشي کولای چې پر استبدادي افکارو سره پر خلکو حکومت وکړي.
جلالي په بدخشان کې د روان وضعیت په تړاو وویل: «بدخشان کې روان حالت د خلکو د غبرګونونو یوه بېلګه ده او ښايي دغسې عکس العملونه په نورو ځایونو کې هم د استبداد پر ضد پیل شي».
د نوموړي په خبره، دغه ډول هڅې که څه هم د طالبانو د «رژیم» د ړنګېدو لامل نهشي کېدای، خو که مقاومتونه او د خلکو درېدنه په منظم ډول ترسره شي، نو بیا د طالبانو د نسکورېدو امکان شته.
د کورنیو چارو دغه پخواني وزیر څرګنده کړه: «یو ملي حرکت، یو ټولشموله خوځښت او د مقاومتونو اتحاد ته اړتیا ده، چې په ښه شکل کې پرمخ لاړ شي. که تعهد وشي او په یوه چوکاټ کې اقدامات وشي، نو بیا بغاوتونه پایله ورکولی شي او باید ملي سازماندهي او رهبري ولري».
د هغه په خبره، تر هغې چې ملي یووالی رامنځته نهشي، نو د طالبانو خلاف روان مقاومتونه او بغاوتونه پایله نهورکوي.
علياحمد جلالي په ډاګه کړه، اوس مهال داسې ښکاري چې د «طالباني استبداد» پر وړاندې ملي او متحد حرکتونه نهشته او پر کابل واکمنه ډله هم له دغې خلا څخه د ځان په ګټه کار اخلي.
نوموړي زیاته کړه: «خلک تر استبداد لاندې دي چې امکانات نهلري او څوک چې بهر کې دي، د یو بل پر وړاندې په مخالفتونو اخته دي. دا د هغو کسانو چې بهر کې مېشت دي مسوولیت دی چې د طالبانو خلاف یو انسجام او یوه ملي رهبري رامنځته کړي».
د دغه پخواني افغان چارواکي او سیاستوال دغه څرګندونې داسې مهال دي، چې د طالبانو خلاف بېلابېلې وسلهوالې جبهې فعالیتونه لري او نیوکې کېږي چې ترمنځ یې یووالی نه لیدل کېږي. تر دې مخکې هم یو شمېر سیاستوالو غوښتنه کړې وه، چې د طالبانو وسلهوالې مخالفې جبهې باید تر یوه چتر لاندې راټولې شي او که داسې ونهکړي، نو روانې هڅې به یې د پام وړ پایلې ورنهکړي.
