فرانسه کې پر پلي کسانو د موټر د قصدي برید له امله دوه افغانان وژل شوي
د فرانسې په کان ښار کې د یوه موټرچلوونکي د قصدي برید له امله دوه افغان وګړي وژل شوي او نهه نور کسان ټپیان شوي دي.
دغه پېښه د چهارشنبې په ماښام، د وږي په څلورمه، د فرانسې د نورماندي سیمې په کان ښار کې د اورګاډي تمځای مخې ته شوې وه، خو د قربانیانو هویت په دې وروستیو کې خپور شوی دی.
د فرانسې خبري اژانس د پولیسو له قوله راپور ورکړی چې موټرچلوونکي تر یوې شخړې وروسته له سیمې ووت، خو وروسته بېرته په موټر کې ورستون شو. نوموړي د بسونو ځانګړې لارې ته ننوت او هغه کسان یې لاندې کړل چې د یوه بس تمځای ته څېرمه ولاړ وو.
په دې برید کې یو ۳۵ کلن افغان سړی ځای پر ځای ووژل شو. دویم قرباني، چې ۲۸ کلن و، تر روغتون ته له لېږدولو وروسته ساه ورکړه. د کان څارنوالۍ ویلي چې هغه هم د افغانستان وګړی و.
په پېښه کې نهه نور نارینه هم ټپیان شوي چې عمرونه یې د ۱۷ او ۳۶ کلونو ترمنځ ښودل شوي دي. د ځینو ټپیانو پښې ماتې شوې دي.
د راپور له مخې، د ټپیانو په ډله کې د فرانسې، مصر، بنګلهدېش او سوډان اتباع هم شامل دي.
پولیسو د پېښې په تړاو یو ۲۶ کلن روسی او د چیچنیا توکمه سړی نیولی دی. ویل کېږي چې نوموړي له برید وروسته له سیمې تښتېدلی و، خو امنیتي ځواکونو هغه د کان ښار شاوخوا ۲۰ کیلومتره لرې په بندري ښار اویسترهام کې ونیو.
د کان څارنوالۍ ویلي چې د پېښې د ځای څېړنې او د شاهدانو څرګندونې ښيي چې موټرچلوونکي د خپل موټر د درولو هڅه نه ده کړې. د څارنوالۍ په وینا، هغه خپله لاره بدله کړې او په قصدي ډول یې د سړک پر غاړه ولاړو کسانو ته موټر ور اړولی دی.
مظنون په لومړنیو پوښتنو کې ادعا کړې چې تر برید مخکې څو کسانو د اورګاډي تمځای مخې ته وهلی او ټکولی و. پولیسو تر اوسه نه دي ویلي چې نوموړي یو مشخص کس هدف ګرځولی و او که یې غوښتل ټول حاضر کسان لاندې کړي.
د کان څارنوالۍ د دې برید ترهګریز اړخ رد کړی او ویلي یې دي چې د مظنون په څرګندونو کې د افراطپالنې، سیاسي یا ایډیولوژیکې انګېزې هېڅ نښه نه ده موندل شوې. د چارواکو په وینا، نوموړی د پېښې پر مهال نشه نه و او پخوانۍ جنايي محکومیت هم نه لري.
د برید انګېزه لا هم روښانه نه ده. څارنوالۍ ویلي چې د دې پېښې او د چیچنیانو او افغانانو ترمنځ د احتمالي شخړې اړیکه هم تر څېړنې لاندې ده.
د کان ښار ښاروال د یوې ښځې پر سر د احتمالي شخړې احتمال هم یاد کړی، خو په دې اړه یې نور جزییات نه دي وړاندې کړي.
