سيبياېس نیوز وايي، امریکا او متحدینو یې له شلو کلونو جګړې او میلیاردونو ډالرو لګښت وروسته افغانستان پرېښود، خو طالبان بیا واک ته ورسېدل او د ښځو او نجونو ډېری لاسته راوړنې له منځه ولاړې.
د راپور له مخې، د «تلپاتې ازادۍ عملیات» په نوم د امریکا پوځي ماموریت د القاعدې د له منځه وړلو او د طالبانو د هغه مهال د حکومت د نسکورولو په موخه پیل شوی و، ځکه طالبانو اسامه بن لادن او د سپټمبر د ۱۱مې د بریدونو طراحانو ته پناه ورکړې وه.
راپور وايي، له هغه وخته چې طالبان نږدې پنځه کاله وړاندې یو ځل بیا واک ته ورسېدل، په افغانستان کې د بشري حقونو وضعیت سخت خراب شوی، اقتصاد له جدي ستونزو سره مخ دی، خوارځواکي زیاته شوې او ښځې او نجونې تر ډېره له عامه ژوند څخه څنډې ته شوې دي.
په راپور کې د افغانستان د جګړې د پایلو په اړه تر ټولو مهمه پوښتنه داسې مطرح شوې: ایا د شلو کلونو جګړه او قربانۍ ارزښت درلود؟
راپور زیاتوي چې د جګړې پر مهال میلیونونو نجونو او ښځو زدهکړو ته لاسرسی پیدا کړ او ښځې د قاضیانو، وکیلانو، د پارلمان د غړو او د بېلابېلو مسلکونو د کارکوونکو په توګه په ټولنه کې فعالې شوې. خو د طالبانو له بیا واکمنېدو سره د دغو لاسته راوړنو یوه لویه برخه له منځه ولاړه.
سيبياېس نیوز د کابل له یوه پټ ښوونځي هم یادونه کړې چې پکې د ۱۴ او ۱۶ کلونو ترمنځ نجونې په پټه زدهکړې کوي.
د راپور له مخې، طالبانو نږدې پنځه کاله وړاندې د نجونو پر منځنیو او لوړو زدهکړو بندیز ولګاوه، خو یو شمېر نجونې لا هم په پټو ټولګیو کې خپلو زدهکړو ته دوام ورکوي.
راپور وايي، د لیدنې پر مهال دغو نجونو د ریاضیاتو پرمختللي درسونه لوستل، چې د زدهکړو لپاره یې د لا هم ژوندي هوډ څرګندونه کوي.
په راپور کې راغلي چې دغه نجونې د نیول کېدو له خطر سره سره پټو ښوونځیو ته ځي، ځکه نه غواړي خپل راتلونکی له لاسه ورکړي.
راپور زیاتوي چې د سپټمبر د ۱۱مې له بریدونو وروسته جګړې افغانستان په ګڼو برخو کې بدل کړ، خو د امریکا او ناټو ځواکونو له وتلو وروسته طالبان یو ځل بیا واک ته ورسېدل.
د راپور له مخې، د شل کلنې جګړې له پای ته رسېدو سره سره د هغې د قربانیو، لګښتونو او لاسته راوړنو په اړه بحثونه لا هم روان دي او دا پوښتنه هم مطرح ده چې د دغې اوږدې جګړې پایلې تر کومه بریده له هغو موخو سره سمون لري چې جګړه پرې پیل شوې وه.
