د سعودي عربستان په مشرۍ پوځي اېتلاف په یوه خبرپاڼه کې ویلي، د ایران له ملاتړه برخمنو حوثي وسلهوالو د دوشنبې په ورځ (د وږي ۲۳مه) په دغه هېواد کې پر ملکي سیمو بریدونه کړي. هممهاله «بلومبرګ» راپور ورکړی، چې سعودي عربستان د حوثیانو د مخنیوي لپاره له برېتانیا د مرستې غوښتنه کړې ده.
د سعودي عربستان په مشرۍ د پوځي اېتلاف په خبرپاڼه کې راغلي، چې د دوشنبې په ورځ د حوثیانو د توغندیزو او بېپیلوټه الوتکو په بریدونو کې د خمیس مشیط، ابها او طایف ښارونو ۱۳ ملکي وګړي ټپیان شوي او اوو استوګنیزو کورونو او دوو موټرو ته زیانونه اوښتي دي.
د اېتلاف په خبرپاڼه کې ویل شوي: «د دغه قصدي او پرلهپسې بریدونو دوام د ترهګرو حوثي وسلهوالو د افراطي چلند او اېډیالوژۍ څرګندونه کوي، چې د کړکېچ د زیاتولو او د ملکي اهدافو او ملکي وګړو د نښه کولو پر لور روان دي».
په خبرپاڼه کې زیاته شوې، چې د اېتلاف د ګډو ځواکونو قومانده به د سعودي عربستان د حاکمیت د ساتنې لپاره له دغه بریدونو سره په مسوولانه او پرېکنده توګه چلند وکړي.
سعودي عربستان له برېتانیا د حوثیانو په وړاندې د مبارزې غوښتنه کوي
ورته مهال «بلومبرګ» راپور ورکړی، چې سعودي عربستان د حوثیانو پر وړاندې د مبارزې لپاره له برېتانیا د مرستې غوښتنه کړې؛ خو د برېتانیا لومړی وزیر انډي برنهام لاهم د دغه غوښتنې د ارزونې په حال کې دی.
د بلومبرګ د راپور له مخې، سعودي عربستان له برېتانیا غوښتي چې هم د بابالمندب له تنګي څخه د حوثیانو د اېستلو او هم د دغه هېواد د تېلو د تاسیساتو پر وړاندې د بریدونو په مخنیوي او دفاع کې ورسره مرسته وکړي.
د راپور له مخې، د برېتانیا لومړي وزیر چې لاهم د حوثیانو پر وړاندې د سعودي عربستان د ملاتړ لپاره د پوځي مرستې د وړاندې کولو په اړه غور کوي له سعودي عربستان سره د مرستې لپاره د برتانوي پوځي سلاکارانو له استولو سره هوکړه کړې؛ خو تر اوسه یې د نورو مرستو د لېږلو ژمنه نهده کړې.
بلومبرګ لیکلي، چې برتانوي چارواکو انډي برنهام ته ویلي بابالمندب تنګی د سمندري لېږد رالېږد او نړۍوال اقتصاد لپاره حیاتي اهمیت لري او باید د حوثیانو له ولکې وژغورل شي. د برېتانیا د بهرنیو چارو او دفاع وزارتونو د «بلومبرګ» پوښتنو ته له ځواب ورکولو ډډه کړې ده.
