د بنګلهدېش د کرېکټ ملي لوبډلې د افغانستان پر وړاندې د ابوظبۍ په ټېسټ لوبه کې په لومړۍ پاڼۍ کې د ټولو لوبغاړو په سوځېدو ۳۴۶ منډې جوړې کړې. د افغان لوبډلې توپاچوونکو د بنګلهدېش د پیاوړي پیل وروسته د هغوی د منډو بهیر ورو کړ او پرلهپسې یې ویکټې واخیستې.
د افغانستان کرېکټ بورډ د معلوماتو له مخې، محمد سلیم ساپي څلور، یمین خان احمدزي درې، عصمت عالم دوه او قیس احمد یوه ویکټ ترلاسه کړه.
د بنګلهدېش په توپوهونکو کې تنزید حسن ۸۳، شادمان اسلام ۶۷ او لېټن داس ۵۳ منډې وکړې. تنزید حسن او شادمان اسلام د لومړۍ ویکټې لپاره ۱۲۴ منډې جوړې کړې، خو افغان توپاچوونکو وروسته د بنګلهدېش د لوبډلې د منډو بهیر محدود کړ.
دا د افغانستان او بنګلهدېش ترمنځ یوازینۍ ټېسټ لوبه ده چې د اکتوبر له ۹مې تر ۱۳مې د متحده عربي اماراتو په ابوظبۍ ښار کې ترسره کېږي. د دې لوبې لپاره د افغان لوبډلې مشري رحمت شاه کوي.
د افغانستان کرېکټ ملي لوبډله نن، د تلې په ۱۷مه، په ابوظبۍ کې د بنګلهدېش پر وړاندې د یوازېنۍ ټېسټ لوبې ډګر ته وځي. دا لوبه به د رحمت شاه زرمتي لپاره د ټېسټ لوبډلې د کپتان په توګه لومړۍ رسمي سیالي وي او دواړه لوبډلې به د شیخ زاید کرېکټ لوبغالي پر میدان سره مخ شي.
د افغانستان او بنګلهدېش ترمنځ دغه پنځهورځنۍ ټېسټ لوبه به د اکټوبر له نهمې تر ۱۳مې نېټې دوام وکړي. د افغانستان کرېکټ بورډ د مهالوېش له مخې، لوبه به د ابوظبۍ پر وخت سهار ۹:۳۰ بجې پیل شي.
رحمت شاه په داسې مهال د ټېسټ لوبډلې مشري پر غاړه اخلي چې افغانستان د روانې اوږدې نړیوالې لوبیزې برنامې په پیل کې له بنګلهدېش سره یوازې یوه ټېسټ لوبه ترسره کوي. د افغانستان کرېکټ بورډ وايي، ټېسټ کرېکټ د ملي لوبډلې د راتلونکو پلانونو مهمه برخه ده او د دې لوبې له لارې به افغان لوبغاړي د لوبې په اوږده بڼه کې د خپلې تجربې د پیاوړتیا فرصت ولري.
د افغانستان کرېکټ بورډ اجراییوي رییس نصیب خان د ټېسټ کرېکټ د اهمیت په اړه ویلي: «ټېسټ کرېکټ زموږ لپاره ډېر زیات اهمیت لري او موږ د لوبې په دې بڼه کې د افغان لوبډلې د پیاوړتیا او لاسته راوړنو د زیاتولو لپاره خپلې هڅې روانې ساتو.»
افغانستان د دې ټېسټ لپاره په خپل نوملړ کې یو شمېر لوبغاړي هم بېرته شامل کړي دي. شاهدالله کمال او یمین احمدزي د کورنیو فرسټ کلاس سیالیو له ښې لوبې وروسته د ټېسټ لوبډلې ته بلل شوي، په داسې حال کې چې ضیاالرحمن اکبر هم له نږدې یو کال وروسته بېرته د ټېسټ لوبډلې برخه ګرځېدلی دی.
خو د افغانستان په نوملړ کې د راشد خان او ابراهیم ځدراڼ نشتوالی د لوبډلې له مهمو بدلونونو څخه دی. د افغانستان کرېکټ بورډ د اعلان شوي نوملړ له مخې، دواړه لوبغاړي د دې ټېسټ لوبې په لوبډله کې شامل نه دي، خو د راتلونکو یو ورځنیو او شل اوریزو سیالیو لپاره په نوملړونو کې شته.
بل لور ته، بنګلهدېش د نجمالحسن شانتو په کپتانۍ کې دې سیالۍ ته راځي. د بنګلهدېش د ټېسټ لوبډله له تجربهکارو لوبغاړو لکه مشفق الرحیم، لېټن داس، مومن الحق او مهدي حسن میراز څخه هم برخمنه ده. دغه لوبډله په وروستیو کې د اسټرالیا پر وړاندې د دوو ټېسټ لوبو لړۍ ۱-۱ مساوي کړې او د لړۍ په لومړۍ لوبه کې یې د اسټرالیا پر وړاندې تاریخي بریا هم خپله کړې وه.
د بنګلهدېش لپاره دا په متحده عربي اماراتو کې لومړۍ ټېسټ لوبه ده. د دغه هېواد روزونکی فیل سیمونز وايي، لوبډله یې د ابوظبۍ له تودې هوا سره د عیارېدو هڅه کوي او هغه لوبغاړي چې له جاپان څخه ورستانه شوي، باید ژر له شرایطو سره ځان برابر کړي. بنګلهدېش د چهارشنبې په ورځ په ابوظبۍ کې له بشپړې لوبډلې سره تمرین هم کړی دی.
دواړه لوبډلې تر دې وړاندې په ټېسټ کرېکټ کې دوه ځله سره مخ شوې دي چې هرې لوبډلې یوه بریا خپله کړې ده. دکرېکټ د نړیوالې شوراد معلوماتو له مخې، رحمت شاه د بنګلهدېش پر وړاندې په ټېسټ لوبو کې د افغانستان له مخکښو منډهوهنکو څخه دی او تر اوسه یې د دې لوبډلې پر وړاندې ۱۴۱ منډې کړې دي.
د ابوظبۍ د لوبغالي شرایط هم د دواړو لوبډلو لپاره د پام وړ دي. د بنګلهدېش د وروستیو تمرینونو راپورونه ښيي چې د لوبې لپاره د سوکه توپاچوونکو رول ته ځانګړې پاملرنه شوې، ځکه د متحده عربي اماراتو په عمومي شرایطو کې د ویکټو د ورو والي له امله سوکه توپاچونه اغېزناک تمامېدای شي.
د افغانستان کرېکټ بورډ د پنجشنبې په ورځ په خپل فېسبوک پاڼه کې د افغانستان او بنګلهدېش د یوازېنۍ ټېسټ لوبې جام د دواړو لوبډلو د کپتانانو له لوري د ابوظبۍ په زاید کرېکټ لوبغالي کې د نندارې لپاره د وړاندې کېدو خبر هم ورکړی دی.
د بنګلهدېش پر وړاندې له دې ټېسټ وروسته به افغانستان په متحده عربي اماراتو کې د بنګلهدېش او زمبابوې په ګډون د یو ورځنیو سیالیو درې اړخیزې لوبلړۍ ته داخل شي. دغه لوبلړۍ به د اکټوبر له ۱۷مې تر ۲۳مې دوام وکړي او دوه مخکښې لوبډلې به پایلوبې ته وځي. له هغې وروسته افغانستان له زمبابوې سره د درې شل اوریزو او دوو ټېسټ لوبو لړۍ هم لري.
په دې توګه، د بنګلهدېش پر وړاندې د جمعې ورځې ټېسټ لوبه د افغانستان لپاره یوازې یوه جلا سیالي نه ده، بلکې د اکټوبر او نومبر میاشتو د پراخ نړیوال کرېکټ پروګرام لومړۍ لوبه هم ده.
افغان ابدالیان د ۲۰۲۶ کال اسیايي لوبو د کرېکټ په سیالیو کې د ګډون لپاره د جاپان ناګویا ښار ته رسېدلي او ټاکل شوې چې د خپلې لومړۍ لوبې په ترڅ کې د پنجشنبې په ورځ د کوربه هېواد جاپان پر وړاندې د کرېکټ ډګر ته ووځي.
د افغانستان کرېکټ بورډ د سپټمبر پر ۲۱مه په یوه خبرپاڼه کې ویلي چې افغان ابدالیان د اسیايي لوبو د کرېکټ سیالیو لپاره د جاپان د ایچي ولایت ناګویا ښار ته رسېدلي دي.
د اسیايي لوبو د رسمي مهالوېش له مخې، د افغانستان او جاپان ترمنځ لوبه د سپټمبر پر ۲۴مه د سهار په ۹ بجو پیلېږي. افغانستان، جاپان او نیپال د نارینهوو د کرېکټ سیالیو په «الف» ګروپ کې شامل دي.
د نارینهوو د کرېکټ په سیالیو کې ۱۰ لوبډلې ګډون کوي چې په دوو ګروپونو وېشل شوې دي. افغانستان، جاپان او نیپال په «الف» ګروپ کې او هانګ کانګ، مالیزیا او عمان په «ب» ګروپ کې دي.
هند، پاکستان، بنګلهدېش او سریلانکا بیا د خپلو درجهبندیو له مخې په مستقیم ډول د سیالیو د پړاو اتو غوره لوبډلو پړاو ته لار موندلې ده. د دواړو ګروپونو دوه غوره لوبډلې به هم د اتو غوره لوبډلو پړاو ته ووځي.
افغانستان به له جاپان وروسته د سپټمبر پر ۲۵مه د نیپال پر وړاندې خپله دویمه ګروپي لوبه ترسره کړي. د دې دوو سیالیو پایلې به د دې په ټاکلو کې مهمې وي چې افغان لوبډله بل پړاو ته لار مومي که نه.
د افغانستان کرېکټ بورډ د اسیايي لوبو لپاره ۱۵ کسیزه افغان ابدالیان لوبډله له مخکې اعلان کړې ده چې مشري یې درویش رسولي کوي.
په لوبډله کې درویش رسولي، اسحاق رحیمي، حسن عیسیخېل، محمد اکرم، عمران میر، خالد تڼیوال، نجیبالله ځدراڼ، فیصل خان، فرمانالله ساپی، کریم جنت، عصمت عالم، ننګیال خروټی، عرب ګل مومند، فریدون داودزی او عبدالله احمدزی شامل دي. د نړیوالې کرېکټ شورا هم د اسیايي لوبو لپاره د افغانستان همدا ۱۵ کسیزه لوبډله ثبت کړې ده.
افغان کرېکټ بورډ ویلي چې افغان ابدالیان د افغان کرېکټ د راتلونکي نسل استازیتوب کوي.
د سپینو زرو مډال دفاع
افغانستان په اسیايي لوبو کې د کرېکټ په وروستۍ دوره کې د نارینهوو په سیالیو کې د سپینو زرو مډال ګټلی و. د ۲۰۲۲ کال اسیايي لوبې په ۲۰۲۳ کال کې په چین کې ترسره شوې وې او د باران له امله د افغانستان او هند پایلوبه بې پایلې شوه، افغانستان د سپینو زرو مډال ترلاسه کړ.
د ۲۰۲۶ کال اسیايي لوبو د کرېکټ نارینهوو سیالۍ د شل اوریزو لوبو په بڼه ترسره کېږي او د سپټمبر له ۲۴مې څخه د اکتوبر تر ۳مې پورې به دوام وکړي. د نړیوالې کرېکټ شورا په وینا، د نارینهوو سیالیو پایلوبه د اکتوبر پر ۳مه ټاکل شوې ده.
د افغانستان کرېکټ لوبډله به د جاپان او نیپال پر وړاندې په ګروپي پړاو کې د بریاوو له لارې د اتو غوره لوبډلو پړاو ته د تګ هڅه وکړي. که افغان ابدالیان له خپل ګروپ څخه بل پړاو ته ووځي، هلته به له هغو څلورو لوبډلو سره یوځای شي چې له وړاندې یې د اتو غوره لوبډلو پړاو ته مستقیمه لار موندلې ده.
د هند کرېکټ ملي لوبډلې د افغانستان پر وړاندې د درې شلاوریزو نړیوالو سیالیو لوبلړۍ په درېیو پرله پسې بریاوو پای ته ورسوله او افغانستان یې په وروستۍ لوبه کې هم په ۱۲۷ منډو مات کړ.
د افغانستان او هند تر منځ د کرېکټ شلاوریزې لوبلړۍ د درېیمې او وروستۍ لوبې تر ټولو مهم لوبغاړی ابهیشېک شرما وو، چې یوازې په ۳۰ توپونو یې سلیزه ووهله او د هند لپاره یې په شلاوریزو نړیوالو سیالیو کې د تر ټولو چټکې سلیزې ریکارډ جوړ کړ.
افغانستان د درې واړو لوبو په جریان کې ونهتوانېد چې د هند پر وړاندې د پام وړ سیالي وکړي.
هند په لومړۍ لوبه کې د افغانستان ۱۵۶ منډې په ۱۳،۴ اورونو کې د درېیو لوبغاړو په زیان پوره کړې او د ۷ وېکټو په توپیر یې بریا خپله کړه. ابهیشېک شرما په دې لوبه کې ۸۲ منډې کړې وې.
په دویمه لوبه کې افغانستان ۱۵۹ منډې د اتو لوبغاړو په زیان جوړې کړې، خو هند دغه هدف په ۱۴،۵ اورونو کې د درېیو وېکټو په زیان بشپړ کړ او بیا یې هم په ۷ وېکټو بریا خپله کړه.
د هند توپاچوونکي نیتیش کمار رېډي درې وېکټې واخیستې، په داسې حال کې چې سنجو سمسون په ۲۲ توپونو ۵۷ ناسوځېدلې منډې وکړې.
هند له همدې بریا سره د لوبلړۍ ګټل له وروستۍ لوبې مخکې یقیني کړي وو.
په وروستۍ لوبه کې چې د پنجشنبې په ورځ (د وږي ۲۶مه) ترسره شوه د افغانستان لپاره ستونزې لا زیاتې شوې. هند لومړی توپ وهنه وکړه او په ۲۰ اورونو کې یې د اوو لوبغاړو په زیان ۲۲۱ منډې جوړې کړې. ابهیشېک شرما ۱۰۸ منډې وکړې، چې په ۳۴ توپونو کې یې نهه څلوریزې او ۱۱ شپږیزې وهلې. نوموړي خپله سلیزه په یوازې ۳۰ توپونو بشپړه کړه؛ دا د یوه هندي لوبغاړي تر ټولو چټکه شلاوریزه نړیواله سلیزه او د ټېسټ لوبېدونکو هېوادونو ترمنځ هم د دغو سیالیو له تر ټولو چټکو سلیزو څخه ده.
سنجو سمسون هم ۵۰ منډې وکړې او له شرما سره یې د لومړۍ وېکټې لپاره ۱۴۲ منډې جوړې کړې. دواړو په لومړیو شپږو اورونو کې ۱۰۰ منډې وکړې، چې د هند لپاره په شلاوریزو نړیوالو سیالیو کې د لومړیو شپږو اورونو تر ټولو لوړه ملګرتیا وه.
افغانستان د ۲۲۲ منډو د هدف په تعقیب کې ژر ژر وېکټې له لاسه ورکړې او په ۱۴،۱ اورونو کې په ۹۴ منډو وسوځېد. نیتیش کمار رېډي او روي بشنوۍ درې ـ درې وېکټې واخیستې او هند په دې توګه د ۱۲۷ منډو ستره بریا ثبت کړه.
د درې واړو لوبو پایلو وښودله چې د افغانستان تر ټولو لویه ستونزه د منډو جوړولو په برخه کې وه. افغان لوبډلې په لومړۍ لوبه کې ۱۵۶، په دویمه کې ۱۵۹ او په درېیمه کې یوازې ۹۴ منډې وکړې. په مقابل کې هند په لومړیو دوو لوبو کې هدفونه په اسانۍ تعقیب کړل او په وروستۍ لوبه کې یې د ۲۲۱ منډو په جوړولو سره د لړۍ تر ټولو ستره بریا خپله کړه.
ابهیشېک شرما په درې واړو لوبو کې هم د هند د توپوهنې مهم لوبغاړی وو. نوموړي په لومړۍ لوبه کې ۸۲ او په دویمه کې ۳۹ منډې کړې وې، او په درېیمه لوبه کې یې د ۱۰۸ منډو په وسیله خپله لړۍ په ریکارډي انداز پای ته ورسوله.
د افغانستان او هند ترمنځ دغه درې لوبیزه لړۍ په داسې حال کې پای ته ورسېده چې هند ټولې درې لوبې وګټلې، افغانستان به اوس د اسیايي لوبو لپاره چمتووالی نیسي، په داسې حال کې چې هند د اسیايي لوبو سیالیو ته مخامخ ځي.
د افغانستان د فوټبال لوبډلې د ۲۰۲۷ کال د اسیا د ۲۰کلنو جام سیالیو د غوراوي پړاو په دویمه لوبه کې له تاجکستان څخه په ۴-۱ ګولونو ماتې وخوړه. دا د دې سیالیو په لړ کې د افغانستان دویمه پرلهپسې ماتې ده او له دې سره د هېواد د ۲۰کلنو لوبډلې د راتلونکي پړاو ته د تګ هېلې لهمنځه ولاړې.
افغانستان په خپله لومړۍ لوبه کې هم اردن ته په یوه ګول ماتې خوړلې وه. دغه لوبډله اوس له دوو لوبو څخه یوه امتیاز هم نه لري او د منفي څلورو ګولونو په توپیر د ډلې د نوملړ په وروستي ځای کې ده.
افغانستان به د اسیايي جام دغو لارموندونکو سیالیو په وروستۍ لوبه کې د کوربه هېواد بحرین پر وړاندې ولوبېږي. بحرین اوس مهال د دې ډلې په سر کې ځای لري.
د افغانستان د ۲۰ کلنو لوبډلې د ایران د روزونکي کوروش برمک تر روزنې لاندې په دې لوبه کې ګډوډه او بېپلانې ښکاره شوه. د لوبې په ۲۴مه دقیقه کې برمک اړ شو چې دوه لوبغاړي له ډګره وباسي او پر ځای یې دوه نور لوبغاړي ولوبوي.
د افغانستان د ۲۰ کلنو لوبډلې، د روزونکي کوروش برمک په وینا، خپل تمرینونه په ځنډ پیل کړي وو. لوبډلې له مناسبو تمریناتي کمپونو، دوستانه لوبو او پوره چمتووالي پرته دغو سیالیو ته مخه کړې وه.
سره له دې، کوروش برمک د سیالیو له پیل مخکې ویلي وو چې د ده لوبډله د وروستي پړاو ته د لار موندلو په موخه بحرین ته راغلې او هغه د خپلو لوبغاړو پر هڅو او هوډ باور لري.
د تاجکستان پر وړاندې د لومړۍ نیمایي په ترڅ کې له بدلونونو وروسته د افغانستان د لوبې حالت یو څه ښه شو او افغان لوبغاړو د تاجکستان پر دروازه څو جدي بریدونه وکړل.
خو په ۳۸مه دقیقه کې تاجکستان خپل درېیم ګول وواهه. دا په داسې حال کې وه چې له دې ګول وړاندې افغانستان ښه لوبه کوله او هڅه یې کوله چې د تاجکستان پر وړاندې مساوي ګول ووهي.
د تاجکستان درې واړه ګولونه د افغانستان د دفاعي کرښې له چپ لوري څخه د بریدونو په پایله کې ووهل شول. دغه برخه د افغانستان د دفاع له کمزورو برخو څخه بلل شوې وه او نوید محبوبی په همدې سیمه کې لوبېده.
محبوبی نه په دفاعي برخه کې بریالی و او نه یې په بریدیزه برخه کې د پام وړ اغېز وښود.
د لوبې لومړۍ نیمایي د تاجکستان په ۳-۱ بریا پای ته ورسېده.
د افغانستان لومړنی ترکیب
حامد امیري د ګول ساتونکی، نوید محبوبی، ناصر محمدي، محمد نوروزي، شعیب حسیني، فرزاد تاجیک، حبیبالله هوتک لوبډلمشر، ارش احمدي، ضامن محمدي، یاسر صافي او عزتالله رحیمي لوبېدونکي لوبغاړي وو.
په دویمه نیمایي کې هم تاجکستان د لومړۍ نیمایي په څېر د لوبې واګې په خپل لاس کې درلود. افغان لوبغاړو ډېره هڅه کوله چې اوږده او بېهدفه توپونه د تاجکستان د ګول ځای پر لور ووهي، خو دغه ډول لوبې کومه پایله ورنه کړه.
په ۸۹مه دقیقه کې تاجکستان یو ځل بیا د افغانستان د دفاع له چپ لوري څخه برید وکړ. د تاجک لوبغاړي له نفوذ وروسته توپ د افغانستان د جریمې سیمې ته وواهه او د سر په ګوزار سره یې څلورم ګول وکړ.
افغان لوبغاړي په دې لوبه کې ګډوډ او ناهمغږي ولوبېدل. په ډېرو صحنو کې د لومړي توپ تر څنګ دویم توپ هم د تاجکستان لوبغاړو ته ورسېد، چې له امله یې افغان لوبډله ونه توانېده د لوبې کنټرول بېرته خپل کړي.
د ګولونو څرنګوالی
د تاجکستان لومړی ګول:
په ۱۷مه دقیقه کې د تاجکستان لوبغاړو د افغانستان د چپ اړخ د مدافعینو له بېپامۍ او کمې پاملرنې ګټه واخیسته او د افغانستان د جریمې سیمې ته ننوتل. د تاجک لوبغاړي له خوا لېږل شوی توپ له ناصر محمدي، د افغانستان له مدافع، سره ولګېد. نوموړی تر فشار لاندې و او توپ په پای کې د افغانستان دروازې ته ننوت. دغه ګول د خپلځاني ګول په توګه ثبت شو.
د تاجکستان دویم ګول:
د تاجکستان لوبغاړو د افغانستان د دفاع له ښي اړخ څخه برید وکړ او د افغانستان د جریمې سیمې په ښي کونج کې د تاجکستان لوبډلمشر کامولوف توپ ترلاسه کړ. هغه د افغان لوبغاړي له تېرولو وروسته له لرې واټنه ډزې وکړې او د افغانستان دروازه یې پرانیسته.
د افغانستان لومړی ګول:
په ۲۹مه دقیقه کې افغان لوبغاړو د تاجکستان د دفاع له ښي اړخ څخه برید وکړ. له دې وروسته توپ د شا پر لور د جریمې سیمې ته ولېږل شو او حبیبالله هوتک د پښې په دنني اړخ توپ وواهه او د تاجکستان دروازې ته یې ولېږه.
د تاجکستان درېیم ګول:
په ۳۷مه دقیقه کې تاجکستان د افغانستان له ښي اړخه د کونج ګوزار ترسره کړ. توپ د څو لوبغاړو له منځه تېر شو او د ډګر چپ اړخ ته ورسېد. وروسته د تاجکستان یوه لوبغاړي توپ د افغانستان د جریمې سیمې ته ولېږه او مهربان د خپلې پښې په سر د توپ لوری بدل کړ او هغه یې د افغانستان دروازې ته ورساوه.
دا د تاجکستان دویم ګول و چې د افغانستان د دفاع له چپ اړخ څخه د برید او توپ لېږد په پایله کې جوړ شو.
د تاجکستان څلورم ګول:
په ۸۹مه دقیقه کې د تاجکستان یو لوبغاړی یو ځل بیا د افغانستان د دفاع له چپ اړخ څخه تېر شو او د افغانستان د چپ مدافع له مخې یې توپ د جریمې سیمې ته ولېږه. اسدبیک د سر په ګوزار توپ ځمکې ته وواهه او هغه یې د افغانستان دروازې ته ورساوه.
په دې توګه تاجکستان خپل درېیم ګول هم د افغانستان د دفاع له چپ اړخ څخه د نفوذ او توپ لېږلو له لارې وواهه.
د ۲۰۲۷ کال د اسیا د ۲۰ کلنو جام د غوراوي سیالۍ د سپټمبر له ۹مې تر ۱۵مې، چې د افغانستان د لمریز کال له مخې د ۱۴۰۵ کال د سنبلې له ۱۸مې تر ۲۴مې سره سمون خوري، په بحرین کې ترسره کېږي.
افغانستان به له تاجکستان سره له نننۍ لوبې وروسته په خپله وروستۍ لوبه کې د سیالیو د کوربه هېواد، بحرین، پر وړاندې میدان ته ووځي.
افغانستان له دوو پرلهپسې ماتې سره په خپله ډله کې د راتلونکي پړاو ته د تګ هېڅ چانس نه لري او په عملي توګه له دغو سیالیو څخه وتلی دی.
د افغانستان د تکواندو لوبغاړو د تکواندو نړیوالو فدراسیون د ولسمشرۍ جام د اتم پړاو په سیالیو کې خپل ګډون پای ته ورساوه. دغه سیالۍ د اسیا په کچه د پاکستان په لاهور ښار کې ترسره شوې چې د جي۳ په کچه وې او د شاوخوا ۴۰ هېوادونو لوبغاړو پهکې ګډون کړی وو.
د افغانستان د تکواندو ملي لوبډلې په دغو سیالیو کې له نهو لوبغاړو سره برخه اخیستې وه. له دې ډلې شپږو لوبغاړو د مبارزې یا کیوروګي او درېیو لوبغاړو د پومسې په برخو کې سیالۍ وکړې.
د سیالیو لړۍ د تېرې دوشنبې په ورځ (د زمري ۲۶مه) پیل شوې وه. د پومسې سیالۍ په لومړۍ ورځ ترسره شوې، په داسې حال کې چې د کیوروګي سیالۍ د زمري په ۲۷مه، ۲۸مه او ۲۹مه ترسره شوې. په پومسه برخه کې سیدرضا اکبري، عبیدالله شیرزي او محمدګل محمدي د افغانستان استازي وو. د دغو سیالیو په پای کې محمدګل محمدي وتوانېد چې د برونزو مډال وګټي.
عبیدالله شیرزي هم د فورمونو په ښه او اغېزناک ترسره کولو سره غوره وړتیا وښوده او د «غوره فعالیت» جایزه یې ترلاسه کړه.
د مبارزې یا کیوروګي په برخه کې د افغانستان ملي لوبغاړو ونهشوای کولای چې مډال وګټي.
احسان رحیمي، حکمتالله زین، عذیر رشید، محمد اشرف شکران، امید سهاک او علياکبر امیري د کیوروګي په برخه کې د افغانستان استازي وو او هر یوه یې د سیالیو لوړو پړاوونو ته د رسېدو لپاره له خپلو سیالانو سره مبارزه وکړه.
په دې منځ کې حکمتالله زین د افغانستان لپاره تر ټولو ښه پایله ثبت کړه.
نوموړي د منفي ۶۸ کیلوګرامه وزن په سیالیو کې لومړی خپل پاکستانی سیال په ګونډو کړ او بیا په دویمه سیالۍ کې یې خپل ازبکستاني سیال هم مات کړ.
زین په درېیم پړاو کې له یوه بل ازبکستاني لوبغاړي سره مخامخ شو، خو له دغه سیال څخه په ماتې خوړلو سره یې د سیالیو دوام پای ته ورسېد.
امید سهاک هم د منفي ۸۷ کیلوګرامه وزن په سیالیو کې خپله لومړۍ لوبه د پاکستان د استازي پر وړاندې په بریا پیل کړه، خو په بل پړاو کې یې له یوه ایراني تکواندوکار څخه ماتې وخوړه او له سیالیو ووت.
عذیر رشید د افغانستان بل استازی وو چې په خپله لومړۍ مبارزه کې د قزاقستان له یوه لوبغاړي سره مخامخ شو، خو له ماتې وروسته یې ونه شوای کولای بل پړاو ته لار ومومي.
په درنو وزنونو کې علياکبر امیري هم د ایران له استازي سره پر تاتامي ودرېد، خو له خپل ایراني سیال څخه له ماتې وروسته د سیالیو له دوام څخه حذف شو.
تر اوسه د احسان رحیمي او محمد اشرف شکران د مبارزو د پایلو په اړه د افغانستان د تکواندو فدراسیون له لوري رسمي معلومات نهدي خپاره شوي.
د افغان لوبډلې لاسته راوړنه
د کیوروګي سیالیو له پای ته رسېدو سره، د افغانستان د تکواندو د کاروان ټولیزه لاسته راوړنه په پومسه برخه کې یو د برونزو مډال او د غوره فعالیت یوه جایزه وه.
په کیوروګي کې بیا حکمتالله زین د دوو بریاوو په ثبتولو سره د افغان تکواندوکارانو ترمنځ تر ټولو ښه پایله درلوده.
د نړیوال تکواندو فدراسیون د ولسمشرۍ جام د اسیا د تکواندو له مهمو سیالیو څخه شمېرل کېږي. د دغو سیالیو G3 کچه لوبغاړو ته د نړیوالې درجهبندۍ لپاره د امتیازونو د ترلاسه کولو ښه فرصت برابروي.
په دا ډول نړیوالو سیالیو کې د افغان تکواندوکارانو ګډون کولای شي د هغوی د نړیوالې تجربې د زیاتېدو او د راتلونکو مهمو سیالیو لپاره د لا ښه چمتووالي په برخه کې مهم رول ولري.