د ملګرو ملتونو د بشري حقونو مشر د عمران خان د خوشې کېدو غوښتنه کړې

د ملګرو ملتونو د بشري حقونو عالي کمېشنر فولکر ترک د پاکستان له چارواکو د دغه هېواد د پخواني لومړي وزیر د خوشې کېدو غوښتنه کړې. نوموړي ویلي، پاکستان دې د سیاسي کړکېچ کمولو لپاره د خبرو لاره غوره کړي او د عمران خان درملنې ته لاسرسی دې تضمین کړي.
فولکر ترک له سي اېن اېن سره په مرکه کې وویل، د عمران خان خوشې کېدل، له هغه سره مناسب چلند او د سیاسي کړکېچ کمول د باور جوړونې مهم اقدامات کېدای شي. نوموړي ټینګار وکړ چې د پاکستان حکومت او مخالفانو ترمنځ د خبرو او تفاهم لپاره باید زمینه برابره شي.
د ملګرو ملتونو د بشري حقونو مشر ویلي، د پاکستان چارواکي باید د بندیانو په اړه نړیوال قانوني معیارونه رعایت کړي، د هغوی کورنۍ لیدنې، وکیلانو ته لاسرسی او روغتیايي خدمات تضمین کړي. هغه زیاته کړې، په پاکستان کې د بشري حقونو مدافعان، خبریالان او سیاسي مخالفان هم له خپلسرو نیونو سره مخ دي.
عمران خان او مېرمن یې بشرا بي بي د راولپنډۍ په اډیاله زندان کې بندیان دي. دواړه د ۲۰۲۵ کال د ډسمبر پر ۲۰مه د توشهخانه دویمې قضیې په تړاو په ۱۷ کلونو بند محکوم شوي وو. دغه قضیه د سعودي عربستان د ولیعهد له خوا د رسمي سفر پر مهال د ورکړل شویو ګاڼو د سیټ د ناقانونه ساتلو له تورونو سره تړاو لري.
عمران خان د ۲۰۲۳ کال له اګست راهیسې په بند کې دی او د ۱۹۰ میلیونه پاونډه د فساد په قضیه کې هم د بند سزا تېروي. نوموړی د ۲۰۲۳ کال د مې د نهمې د اعتراضونو په تړاو د ترهګرۍ ضد قانون له مخې له نورو محاکمو سره هم مخ دی.
