ماریا زاخارووا، سخنگوی وزارت خارجه روسیه در پاسخ به سوال یک خبرنگار افغان مبنی بر احتمال تشدید درگیری بین تاجیکستان و طالبان گفت در صورت تشدید اوضاع در مرز تاجیکستان و افغانستان، روسیه قاطع‌ترین اقدام را برای کمک به تاجیکستان انجام خواهد داد.
وزارت خارجه روسیه هفته گذشته از تاجیکستان و افغانستان خواسته بود که هر نوع اختلاف میان دو کشور را به طرز قابل قبولی حل کنند.
این وزارت گفته بود براساس اطلاعاتی که طالبان به دست داده‌اند ده‌ها هزار نیروی ویژه این گروه به ولایت تخار در مجاورت تاجیکستان اعزام و مستقر شده‌اند.
به گزارش ریانووستی، خانم زاخارووا امروز پنجشنبه، ۱۵ میزان گفت در صورت تشدید اوضاع، پایگاه نظامی ۲۰۱ روسیه در خاک تاجیکستان برای کمک به این کشور با مدرن‌ترین تجهیزات آماده است.
