تاجیکستان اعلام کرد هزاران نسخه قرآن که در آغاز سال جاری از افغانستان وارد این کشور شده بود و در مصادره بود به افغانستان بازگردانده شد. سهراب ذاکروف از مقامات ارشد گمرک تاجیکستان در یک نشست خبری گفت که قرآنها بدون موافقت کمیته دین تاجیکستان آورده شده بودند.
گفته شده این قرآنها در آغاز سال جاری توسط یک تاجر افغان از منطقه مرزی نیژنی پیانج وارد شده بودند که "به دلایل امنیتی" تا پایان نتیجه کمیته دین تاجیکستان در مصادره بودند.
گمرک تاجیکستان درباره اینکه چه تعدادی قرآن مصادره و بازگردانده شده جزئیاتی نداده است.
گفته شده این قرآنها با موتر باربری به تاجیکستان برده شده بودند و وزن هر نسخه ۲.۵ کیلو بوده است.
این تصمیم دولت تاجیکستان همزمان با گزارشها درباره جذب جوانان این کشور به گروههای افراطی فعال در افغانستان گرفته شده است، از جمله در "جنبش طالبان تاجیکستان".
منابع افغانستان اینترنشنال میگویند این جنبش اخیرا تشکیل شده و در حال سربازگیری شهروندان تاجیکستان با هدف سرنگونی حکومت امامعلی رحمان است. به گفته منابع اعضای این جنبش به ۲۰۰ نفر میرسد.
