انتونی بلینکن، وزیر خارجه امریکا سه شنبه در دیدار با وزیر خارجه تاجیکستان در واشنگتن گفت که ایالات متحده بر «روابط عمیق با تمام دوستانش در آسیای میانه» کار میکند. همتای تاجیکستانیاش، سراجالدین مهرالدین بر امنیت منطقه، به خصوص نگرانی این کشور از ناحیه افغانستان تاکید کرد.
ایالات متحده پس از خروج از افغانستان به دنبال جلب همکاریهای امنیتی کشورهای آسیای میانه، به خصوص تاجیکستان و ازبیکستان، برای مبارزه با گروههای تروریستی است که عمدتاً در زیر حاکمیت طالبان در افغانستان حضور و فعالیت دارند.
امریکا برای جلب همکاری این دو کشور وعده داده است که هواپیماهای سابق ارتش افغانستان را که پیلوتهای افغان پس از سقوط دولت به این کشورها فرار داده بودند، به آنان بدهد.
بلینکن امریکا را «شریک پایدار» تاجیکستان توصیف نمود.
مهرالدین در واشنگتن گفت که روی توسعه تجارت و پروژههای عمرانی با همتای امریکاییاش گفتگو کرد. اما، او مهمترین دغدغه کشورش را «امنیت منطقهای» توصیف نمود.
او گفت: «همان طور که برای همکار عزیز خود یادآوری کردم، مهمترین موضوع برای ما امنیت داخلی و منطقهای، به خصوص مسایل مربوط به افغانستان است.»
او افزود که تاجیکستان و امریکا «روی این موضوعات همکاری نزدیک خواهند داشت.»
وزیر خارجه تاجیکستان روز یکشنبه در مجمع عمومی سازمان ملل گفت که «افغانستان به سرعت به پناهگاه تروریستها و گسترش افراطگرایی در منطقه مبدل میشود.»
او با نگرانی افزود که شبه نظامیان آسیای مرکزی برای بی ثبات کردن منطقه، به شمال افغانستان انتقال یافته اند و در پی ایجاد تنشها در نزدیک مرز تاجیکستان اند.
