حنا ربانی، معاون وزیر خارجه پاکستان در حاشیه نشست کشورهای همسایه افغانستان در سمرقند، با چین گانگ، امیرعبداللهیان، بختیار سعیداف، وزیران خارجه چین، ایران و اوزبیکستان جداگانه دیدار کرد. حنا ربانی در این دیدارها خواهان همکاری این کشورها برای تامین صلح و ثبات در افغانستان شد.
وزیرخارجه ایران نیز در دیدار با حنا ربانی، خواست مشابهی داشته است.
امیرعبداللهیان همکاری نزدیک ایران و پاکستان در مسائل افغانستان را بسترساز ارتقای همکاری‌های سه جانبه دانسته است.
او می‌گوید: «ایران و پاکستان هر دو از اتفاقات افغانستان به طور مستقیم تاثیر می‌پذیرند و همین نکته، تقویت بیش از پیش اشتراکات و همکاری‌ها را ضروری‌تر می‌سازد.»
نشست سمرقند، روز پنجشنبه، ۲۴ حمل با حضور وزیران خارجه روسیه، چین، ایران، پاکستان، تاجیکستان، ترکمنستان و اوزبیکستان برگزار می‌شود.
امیرخان متقی، وزیر خارجه طالبان نیز به سمرقند رفته و تاکنون با وزیر خارجه ایران دیدار کرده است.