تاجیکستان می‌خواهد با همکاری کوریای جنوبی تا مرز افغانستان خط‌آهن بسازد
خبرگزاری آسیاپلاس تاجیکستان گزارش داد که این کشور با همکاری آژانس همکاری‌های بین‌المللی کوریا (КОIСА) می‌خواهد تا مرز افغانستان خط‌آهن بسازد. عظیم ابراهیم، وزیر حمل و نقل تاجیکستان گفت هدف این پروژه، ورود به بازار کشورهای جنوب آسیا است.
در این گزارش که روز جمعه (۱۲ اسد) منتشر شده، به نقل از عظیم ابراهیم گفته شده که در صورت اجرای موفقیت‌آمیز این پروژه، تاجیکستان به یک کشور ترانزیتی ریلی جذاب تبدیل می‌شود.
به گفته وی، با این خط‌آهن حمل و نقل کالا و محصولات با کشورهای همسایه تاجیکستان افزایش می‌یابد که نه تنها برای این کشور بلکه برای سایر کشورهای منطقه بسیار مفید خواهد بود.
گفته شده طول راه‌آهن تا مرز افغانستان حدود ۵۱ کیلومتر خواهد بود.
کیم جون سیک، دیپلومات کوریای جنوبی در تاجیکستان گفته است که این پروژه گامی به سوی آینده مرفه برای تاجیکستان است.
به گفته این دیپلومات کوریا، این پروژه به تاجیکستان امکان می‌دهد به یک حلقه کلیدی در حمل و نقل بین‌المللی تبدیل شود.
او همچنین گفت که این پروژه ساخت راه‌آهن اولین پروژه کوریای جنوبی در آسیای مرکزی است.
این دیپلومات ابراز امیدواری کرده که این پروژه ظرف سه سال آینده به طور کامل اجرایی شود.