آژانس پناهندگان سازمان ملل اخراج اجباری پناهجویان افغان از تاجیکستان را غیرقانونی خوانده و خواستار توقف آن شده است. این سازمان گفت که دستکم ۸۰ پناهجوی افغان که بیشتر آنها دارای اسناد اقامت معتبر بودند در دسامبر سال ۲۰۲۴ از تاجیکستان اخراج شدند.
آژانس پناهندگان سازمان ملل به خبرگزاری فرانسه گفت: «ما از بازگشت اجباری حداقل ۸۰ پناهجوی افغان به افغانستان در دسامبر ۲۰۲۴ آگاه هستیم. بیشتر آنها اسناد معتبر و کارت پناهندگی داشتند.»
این سازمان تأکید کرد که بازگشت اجباری پناهجویانی که در معرض خطر شکنجه یا سایر موارد نقض جدی حقوق بشر اند، با قوانین پناهندگی تاجیکستان مغایرت دارد.
هزاران شهروند افغانستان از دهه ۱۹۹۰ و پس از بازگشت طالبان به قدرت در اگست ۲۰۲۱ به تاجیکستان پناه آوردهاند.
براساس گزارشها، تا پایان سال ۲۰۲۴ تقریباً ۹ هزار پناهجوی افغان در تاجیکستان حضور داشتند. دولت تاجیکستان میگوید این پناهجویان تا زمانی که در این کشور هستند از بسیاری حقوق مشابه شهروندان تاجیک برخوردارند.
تاجیکستان و افغانستان پیوندهای فرهنگی، زبانی و قومی نزدیکی دارند، اما روابط این دو کشور پس از بازگشت طالبان به قدرت تیره شده است. برخلاف دیگر رهبران آسیای مرکزی، امامعلی رحمان، رئیسجمهور تاجیکستان، از برخورد طالبان با افغانها انتقاد کرده است.
