یوسف وفا، والی طالبان در بلخ در سفر به تاجیکستان با رئیس شورای علمای این کشور دیدار کرد. دفتر والی طالبان در بلخ گفت که یوسف وفا در این دیدار، نسخه‌ای از قانون امر به معروف، سخنرانی‌ها و دستورات رهبر طالبان را به رئیس شورای علمای تاجیکستان هدیه داده است.
دفتر والی طالبان در بلخ، تصویری از نسخه‌هایی که به رئیس شورای علمای تاجیکستان هدیه داده شده را در اکس منتشر کرده است.
دفتر والی طالبان در بلخ روز پنجشنبه یکم عقرب در خبرنامه‌ای نوشت هدف از اهدای این کتاب‌ها به رئیس شورای علمای تاجیکستان، این بود که «هدف و مفکوره ما را درک کنند.»
طبق خبرنامه، در این دیدار بسیاری از علمای برجسته و شیوخ بزرگ تاجیکستان نیز حضور داشتند.
والی طالبان در بلخ که از افراد نزدیک به ملاهبت‌الله آخندزاده است،به علمای تاجیکستان گفت: «ما هر دو کشور اسلامی هستیم.»
یوسف وفا همچنین خواستار رفت و آمد علمای تاجیکستان به افغانستان برای گسترش روابط شد.
والی طالبان در بلخ در سخنانی به علمای تاجیکستان گفت که همه مسئولان و وزیران اداره طالبان علما و شیوخ اند. او مدعی شد که هبت‌الله آخندزاده «فقیهی خوب و واعظ خوب عصر است.»
او در این دیدار با اشاره که به اینکه اوزبیکستان در ولایت بلخ یک مدرسه دینی بزرگ می‌سازد، از علمای تاجیکستان نیز خواست تا در ساخت مدارس دینی و مساجد در افغانستان سهم بگیرند.
والی طالبان در بلخ روز پنجشنبه یکم عقرب به تاجيکستان سفر کرد. او در اولین روز از سفرش به شهر دوشنبه، با خورشید عطازاده، فرمانده مرزها و سیدمومن ستاراویچ، وزیر استخبارات تاجیکستان دیدار کرد.
تاجیکستان روابط دیپلوماتیک با طالبان ندارد و پس از سقوط نظام جمهوری، میزبان شماری چهره‌های مخالف طالبان نیز بوده است.
در حال حاضر سفارت افغانستان در شهر دوشنبه در کنترول نماینده دولت ساقط شده افغانستان است، اما یک قنسولگری افغانستان در شهر خاروغ تاجیکستان به طور مستقیم تحت حمایت و زیر نظر وزارت خارجه طالبان کار می‌کند.
