همدا تېره شپه هم په چترال کې د پاکستاني پوځ او وسلهوالو تر منځ جګړې شوې دي او لا هم په سیمه کې د سپکو او درنو وسلو ډزې اورېدل کېږي. خو د تازه جګړې د زیانونو په اړه لا کره معلومات نه دي ورکړل شوي.
وړمه شپه پاکستاني طالبانو د پاکستان پوځ په څو پوستو بریدونه کړي و، چې دواړو لوریو ته د مرګژوبلې ادعاګانې شوې وې.
د پاکستان پوځ رسنیزې برخې خبر ورکړی و، چې په چترال کې یې له ټيټيپي سره په جګړه کې ۴ عسکر وژل شوي او په دغه جګړه کې يې ۱۲ وسلهوال هم وژلي دي.دغه بریدونه وړمه شپه پاکستاني طالبانو د چترال په کېلاش سیمه کې کړي و او د راپورونو له مخې تېره شپه هم جګړه شوې.ټيټيپي د دغو بریدونو مسوليت منلی او پوځ ته يې د سر درانه زیان دعوه کړې.تېره ورځ ناوخته پاکستاني رسنیو يوه ويډیو خپره کړه، چې په چورلکو کې يې پاکستاني پوځيان د جګړې سیمې ته لېږدول.پاکستاني پوځ ادعا کړې، چې وسلهوال بریدکوونکي د افغانستان له کونړ او نورستانه ورغلي وو؛ خو کابل کې طالبانو لا دغې دعوې ته غبرګون نه دی ښودلی.د چترال د بریدونو په اړه ځايي چارواکو پرون رسنیو ته ویلي و، چې هلته ځينې لویې لارې تړل شوې، په بمبوريت او اشکويي سېمو کې سخته جګړه شوې، وسلهوال ځينو سيمو ته ننوتي و؛ خو دوی کېلاش ته تللی سړک بند کړی دی.په دې ورستيو کې د پاکستان د ننه او قبایلي سېمو کې امنيتي حالت تر پخوا ترینګلی شوی، وخت نا وخت پر پاکستاني پوځ او نورو امنيتي کسانو بریدونه کېږي؛ خو دا لومړی ځل دی چې وسلهوال دې له پوځ څخه په جګړه کې یوه سېمه لاندې کړي.
