د مانچسټر یونایټیډ د برازیلي لوبغاړي انتوني د کورني تاوتریخوالي او شخړې قضیه هره ورځ نوي اړخونه اخلي. ګلوبو برازیل راپور ورکړ، چې د انتوني د ژوند ملګرې ګابریلا کالاوین لخوا ثبت شوې قضیه د هغه یوازینۍ قضیه نه ده.
د ۲۰۲۲ میلادي کال د مې په ۲۲مه نېټه، رایسا دي فریتش هم له انتوني د تاوتریخوالي له امله شکایت کړی.
د ګابریلا کالاوین پر شکایت سربیره، د انتوني په وړاندې دوه نور شکایتونه هم شته. «رایسا ډی فریتش» هم ادعا کوي چې د انتوني لخوا هغه مهال ورسره تاوتریخوالی وشو، چې د هغه غوښتنې ته یې «نه» وویل او وروسته بیا روغتون ته لیږدول شوې.
ویل کیږي چې ریکارډ شبکه به ډېر ژر د دریمې شکایت کوونکې مرکه خپره کړي.
لومړنی شکایت د انتوني د ژوند د ملګرې ګابریلا لخوا ثبت شوی و، چې هغه یې په کورني تاوتریخوالي تورن کړ.
هغه پیښه چې د ۲۰۲۳میلادي کال په جنوري میاشت کې رامنځته شوه او د UOL راپور له مخې ، انتوني هغه سر ته په لغتو او سوکانو وهلې چې د نوموړې د ټپې کیدو لامل شو.
ګابریلا د ۲۰۲۳ میلادي کال په جون میاشت کې د برازیل په سایوپاولو کې د انتوني په وړاندې خپل شکایت ثبت کړ. هغې د انتوني په اړه د مانچسټر ښار پولیسو ته هم شکایت کړی دی.
ګابریلا وویل، چې په ۲۰۲۲ میلادي کال کې د انتوني تاوتریخوالی د دې لامل شو چې د مېندوارۍ په شپاړلسمه اونۍ کې خپل ماشوم زیان کړي.
مانچسټر یونایټیډ چې له اوږدې مودې راهیسې د میسون ګرینوود له قضیې سره مخامخ و، اوس د انتوني له دې جنجال سره ښکیل دی.
دا کلب څو ورځې وړاندې په یوه رسمي بیان کې د انتوني پروړاندې تورونه تایید او لیکلي یې دي: "مانچسټر یونایټیډ د انتوني پروړاندې تورونه تایید کړي او اعلان کوي، چې پولیس په دې اړه خپلې څیړنې کوي. کلب د نورو معلوماتو په تمه دی او په دې اړه نور خپل نظر نه څرګندوي. د یوه کلپ په توګه، د کورني تاوتریخوالي قربانیانو باندې د دې تورونو او پایلو په پام کې نیولو سره دا مسله جدي ګڼو».
د مانچسټر ښار پولیسو هم څو ورځې وړاندې په دې قضیه کې خپلې پلټنې پیل کړې دي.