د هند لومړي وزیر نریندرا مودي په نوي ډیلي کې د جي شل سرمشریزې د پرانیستې پر مهال وویل، چې افریقایي ټولنه به د دایمي غړې په توګه له دې ډلې سره یوځای شي.
د سيانان د راپور له مخې د هند لومړي وزیر ټینګار وکړ، چې د جي شل په ډله کې د افریقایي ټولنې غړیتوب به د همکارۍ د پیاوړتیا لامل شي.
ښاغلي مودي زیاته کړه: "زه ډاډه یم، چې هرڅوک د دغه غړیتوب پلوي دي."
د جي شل ډلې سرمشریزه د شنبې په ورځ په ډیلي کې جوړه شوه.
د جي شل ډلې هېوادونو ترڅنګ د نهو نورو هېوادونو (بنګله دېش، مصر، هسپانیا، موریس، نایجریا، هالنډ، متحده عربي اماراتو، عمان او سینګاپور) مشرانو ته هم په دغو مراسمو کې د ګډون بلنه ورکړل شوې ده.
په دغې غونډه کې د روسیې د بهرنیو چارو وزیر سرګي لاوروف د روسي پلاوي مشري کوي.
د دغو هېوادونو مشران په ډیلي کې سره راټول شوي، چې په مهمو نړۍوالو مسلو خبرې وکړي.
