د لیبیا په ختیځ کې چارواکو اعلان کړی، چې د ډرنا په ښار کې د توپان او سخت باران له امله د راوتلو سېلابونو په پایله کې کابو دوه زره کسان مړه شوي او زرګونه نور ورک شوي دي.
د ليبيا د ملي پوځ وياند احمد مسماري د دغه هېواد په ختيځ کې د لادرکه شويو کسانو شمېر تر شپږو زرو پورې اعلان کړى دى.
مسماري یوه ټلویزیوني خبري کنفرانس ته وویل، ناورین تر هغه وروسته رامنځته شو چې د ډرنا ښار پورتني بندونه مات شول او "ټول ګاونډ یې له اوسېدونکو سره سېند ته وغورځاوه."
تر دې مخکې د دوشنبې په ورځ په سیمه کې د سرې میاشتې د مرستندویه ډلې مشر ویلي و، چې په ډرنا کې د وژل شویو کسانو شمېر ۱۵۰ تنه دی او اټکل کېږي چې دغه شمېر ۲۵۰ ته ورسېږي.
په لیبیا کې د ۲۰۱۱ کال له ملي پاڅون وروسته، دغه هېواد له سیاسي پلوه په ختیځ او لویدیځو برخو وېشل شوی او ډېری وخت عامه خدمتونه هم په کې نه تر سترګو کېږي.
په طرابلېس کې په نړۍواله کچه پېژندل شوی حکومت د دغه هېواد په ختیځو سیمو کنټرول نهلري.
د مراکش یو شمېر خلکو چې د یوې پېړۍ په اوږدو کې یې د هېواد تر ټولو سترې زلزلې له امله مېنې ویجاړې شوې، څلورمه شپه هم له کورونو بهر تېره کړه.
د مراکش له ژغورونکې ډلې سره د برېټانیا، اسپانیا او قطر د پلټنې ډلې هم یوځای شوې دي.
د مراکش د اطلس په دنګو غرونو کې د ۶.۸ درجې په لویوالي دغې زلزلې د دغې سیمې د خښتو پاخه کورونه ویجاړ کړي دي.
د تېنمل په کلي کې شاوخوا ټول کورونه ویجاړ شوي او ټول اوسېدونکي یې بې کوره شوي دي، دا رنګه دغلته د خاورو د ډېریو لاندې د لسګونه لمنځه تللیو څارویو بوی ټوله سیمه په سر اخیستې ده.