په افغانستان کې د برېټانیا پخواني سفیر له افغانستان انټرنشنل سره په مرکه کې ویلي، چې د طالبانو حکومت به دوام ونه کړي، ځکه افغانان د طالبانو په هېنداره کې ځان نه ویني. نیکولاس کي ویلي، چې افغانستان به د یو بل ستر بدلون شاهد وي.
ښاغلي کي د دوشنبې په ورځ له افغانستان انټرنشنل سره په ځانګړې مرکه کې هغه لاملونه یاد کړل، چې د طالبانو زیانمنتیا، کمزورتیا او انزوا ښيي.
هغه وویل: "طالبان باید مخکې له دې چې فکر وکړي د تل لپاره په واک کې پاتې کېږي، تاریخ، افغان ولس او نور سیمهییز لوبغاړي دې وګوري."
د برېټانیا پخواني سفیر په تېرو پنځوسو کلونو کې د افغانستان تاریخ ته په اشارې سره وویل، چې لږ تر لږه اووه بېلابېل رژیمونه یې تجربه کړې دي.
دغه پخوانی بریټانوي چارواکی وايي، تاریخي شواهد ښيي چې افغانستان د یوه بل کړکېچن بدلون شاهد دی.
ښاغلي کي په نړۍواله ټولنه کې د طالبانو سیاسي انزوا، د طالبانو په منځ کې خپلمنځي اختلافات، له ګاونډیو هېوادونو په ځانګړې توګه له پاکستان سره ترېنګلې اړیکې، د نړۍوالو مرستو کموالي او د یوه ټولګډونه حکومت نشتوالي ته اشاره وکړه او د هغه په وینا، د طالبانو له سترګو یې خوب تښتولی دی.
دغه پخوانی برېټانوی چارواکی وايي، چې تر اوسه هېڅ یوه هېواد طالبان په رسمیت نهدي پېژندلي او دا ډله د نړۍوالې انزوا له امله زیانمنه شوې ده.
هغه وویل، چې د طالبانو کمزورتیا به په افغانستان کې د پاڅون، بغاوت او د دغه رژیم د بې ثباتۍ لامل شي.
امریکا او طالبان
د نیکولاس کي په باور، امریکا او ملګرو یې د افغانستان کیلي طالبانو ته ورکړه.
هغه وویل، که امریکا او متحدینو یې له افغان امنیتي ځواکونو سره مرسته کړې وای او مالومات یې له هغوی سره شریک کړي وای، طالبان به هېڅکله بریالي شوي نه وای.
له دې سره نوموړی ادعا کوي، چې طالبان د امریکا، برېټانیا او سعودي عربستان لهخوا جوړ شوي نهدي؛ بلکې د شواهدو او اسنادونو پر بنسټ د پاکستان د سیاسي نظام لهخوا په جدي توګه د طالبانو ملاتړ شوی دی.
ښاغلي کي زیاته کړه، چې امریکا په افغانستان کې پاتې کېدو ته سیاسی لېوالتیا نه درلوده او ووتله.
هغه وایي، د طالبانو د ادعا پر خلاف ، دغې ډلې له پوځي اړخه امریکا ته ماتې نهده ورکړې، بلکې د دوی بریا ډیپلوماټیکه وه؛ خو نوموړي د افغانستان د پخواني حکومت دننه سیاسي رقابتونه، فساد او د ځان په ګټه سیاستونو ته هم اشاره وکړه، چې پخوانی افغان حکومت یې کمزوری کړ او واک ته د طالبانو د رسېدو لامل شو.
ښاغلي کي د امریکا راتلونکو ټاکنو او د افغانستان پر سیاسي راتلونکې یې اغیزو ته اشاره وکړه او ویې ویل، که ډونالډ ټرمپ بیا ځلې واک ته ورسیږي، واشنګټن به د افغانستان په اړه احتمالي "خطرناک سیاستونه" ولري.
داعش او القاعده
نیکولاس کي وايي، که څه هم د ۲۰۰۱ کال پرتله د القاعدې ډلې ګواښ کم شوی؛ خو دغه ګواښ صفر شوی نهدی.
هغه د امریکا د استخباراتو د سازمان وروستیو ارزونو ته په اشارې سره وویل، چې القاعده ډله افغانستان ته بیا ځلې راګرځېدلې ده.
ښاغلی کي وايي، القاعده ډله د طالبانو ملاتړ له ځانه سره لري او په وروستیو کلونو کې د دغو دوو ډلو نږدېوالی نه دی بدل شوی؛ خو د دغه پخواني برېټانوي چارواکي په وینا اوسمهال داعش ډله د القاعدې پرتله ګواښ ګڼل کېږي، ځکه په افغانستان کې د طالبانو له واکمنۍ وروسته د داعش د فعالیت لپاره مناسب چاپېریال رامنځته شوی دی.
له ګاونډیانو سره ترېنګلې اړیکې
نیکولاس کي له ګاونډیو هېوادونو سره د طالبانو کړکېچنو اړیکو ته هم اشاره کړې او ویلي یې دي، چې که څه هم د پاکستان له لوري د طالبانو جدي ملاتړ کېده؛ خو په دې وروستیو کې د طالبانو او پاکستان ترمنځ اړیکې ډېرې ترېنګلې شوې او طالبان باید پوه شي، چې دا موضوع د دوی لپاره څومره ګواښوونکې ده.
هغه وويل، چې طالبان د خپلو ځينو ګاونډيانو په اړه اندېښمن دي او له بلې خوا په پاکستان کې مېشتو ترهګرو ډلو سره نږدې اړيکې لري.
ښاغلي کي په ډاګه کړه: "تاریخ ښیی، چې د افغانستان د برخلیک په ټاکلو کې د سیمې د هېوادونو رول خورا پیاوړی دی."
