د مراکش دولتي ټلویزیون د دوشنبې ورځې په وروستیو کې راپور ورکړ، چې ددغه هېواد د مرګونې زلزلې د قربانیانو شمېر ۲۸۶۲ تنه او د ټپیانو شمېر یې ۲۵۶۲ کسانو ته لوړ شوی دی. په لریو پرتو سیمو کې د دغې زلزلې د ورکو شویو خلکو کره شمېره لاهم څرګنده نهده.
د مراکش یو شمېر خلکو چې د یوې پېړۍ په اوږدو کې یې د هېواد تر ټولو سترې زلزلې له امله مېنې ویجاړې شوې، څلورمه شپه هم له کورونو بهر تېره کړه.
د مراکش له ژغورونکې ډلې سره د برېټانیا، اسپانیا او قطر د پلټنې ډلې هم یوځای شوې دي.
د مراکش د اطلس په دنګو غرونو کې د ۶.۸ درجې په لویوالي دغې زلزلې د دغې سیمې د خښتو پاخه کورونه ویجاړ کړي دي.
د تېنمل په کلي کې شاوخوا ټول کورونه ویجاړ شوي او ټول اوسېدونکي یې بې کوره شوي دي، دا رنګه دغلته د خاورو د ډېریو لاندې د لسګونه لمنځه تللیو څارویو بوی ټوله سیمه په سر اخیستې ده.
