د ترکیې استازي د دوشنبې په ورځ د ملګرو ملتونو د بشري حقونو د شورا په ۵۴مه غونډه کې وویل چې، له تعلیم او کار څخه د افغانو ښځو بې برخې کول به په اوږده مهال کې د دغه هېواد ټولنیز او اقتصادي وضعیت لاپسې خراب کړي.
هغه وویل، چې دغه بندیزونه د افغانانو له غوښتنو سره په ټکر کې دي.
نوموړي همداراز زیاته کړه، چې ترکیه د افغانانو په ځانګړې توګه له افغان ښځو او نجونو سره د پیوستون اعلان کوي.
په ملګرو ملتونو کې دغه ترکي چارواکي په افغانستان کې د بشري وضیعت په اړه د اندېښنې په څرګندولو سره ویلي، چې ۲۸ میلیونه افغانان بېړنیو بشري مرستو ته اړتیا لري.
هغه د ملګرو ملتونو د بشري حقونو د شورا په غونډه کې وویل، هره شپه په میلیونونو افغان ماشومان وږي ويده کېږي.
د ترکیې استازي زیاته کړه، انقره هڅه کوي چې له طالبانو سره د خبرو له لارې بشري حقونو ته وده ورکړي او په افغانستان کې د خلکو د اقتصادي او ټولنیز ګډون لپاره لارې چارې ومومي.
نوموړي د مرستندويه ټولنو فعاليتونه د افغانانو د اقتصادي او معيشیتي دردونو د هواري په برخه کې ګټور وبلل او ملاتړ يې وکړ.