هېدربار: په افغانستان کې د ښځو د حقونو سرغړوونکي باید محاکمه شي
د بشري حقونو د څار سازمان د ښځو څانګې مرستیالې هېدر بار له افغانستان انټرنشنل سره په مرکه کې ویلي، چې په افغانستان کې د ښځو د حقونو سرغړوونکي باید محاکمه شي.
د بشري حقونو د څار سازمان د ښځو څانګې مرستیالې هېدر بار له افغانستان انټرنشنل سره په مرکه کې ویلي، چې په افغانستان کې د ښځو د حقونو سرغړوونکي باید محاکمه شي.
نوموړې وويل: په تېرو دوو کلونو کې د طالبانو کار د "بشریت ضد جرم "، په ځانګړي توګه د "ښځو پر وړاندې جرم" دی.
هېدر بار د افغان ښځو وضعیت ته د نړۍ په بې غورۍ نیوکه وکړه او ویې ویل:«د ښځو حقونه د نړۍ لپاره دومره اړین نهدي او د دوی د وضعیت په اړه هغه څه اندېښمنونکي نهدي لکه څنګه چې باید وي.»
هغې زیاته کړه:«د افغان ښځو ناوړه حالت نړۍ ته د منلو نهدی.»
د بشري حقونو د څار سازمان مرستیالې دې ته په اشارې چې افغانستان د نړۍوالې ټولنې لومړیتوب نهدی، وویل: لا هم په نړۍ کې داسې هېوادونه شته، چې غواړي له طالبانو سره تعامل وکړي.
د مېرمن بار په وینا، سره له دې چې له طالبانو سره دغو خبرو د افغانستان د خلکو لپاره کومه مثبته پایله نهده لرلې، ځینې هېوادونه غواړي له ترهګرۍ سره د مبارزې په پلمه له طالبانو سره اړیکې ټینګې کړي.
اغلې بار د دغو تعاملاتو پایلو ته په اشارې زیاتوی:«پر افغان ښځو د دغو بندیزونو دوام د نورې نړۍ لپاره منفي پایلې لرلی شي.»
هېدر بار په افغانستان کې د بشري حقونو، په ځانګړي توګه د ښځو د حقونو د سرغړونو په اړه د اسنادو مستند کول او د ثبوتونو راټولول په راتلونکې کې د عاملینو د محاکمه کولو لپاره غوره لاره ګڼې.
هغې وويل، چې د ملګرو ملتونو له ځانګړي استازي سره يې په بېلابېلو ناستو کې له هغه غوښتي، چې د افغان مېرمنو د وضعيت څېړلو ته په ځانګړو راپورونو او څېړنو کې لومړيتوب ورکړي.
مېرمن بار په افغانستان کې دننه او بهر د افغان مېرمنو د مبارزې ستاینه وکړه او ویې ویل:«افغان مېرمنو بې ساري زړورتیا او هوډ ښودلی دی.»
د دې تر څنګ د بشري حقونو د څار سازمان په خپلې اېکس پاڼې هم د افغان ښځو د وضعیت او د دغې څارونکې د سپارښتنو په اړه یوه خبرپاڼه خپره کړې ده.
په خبرپاڼه کې ويل شوي چې د بشري حقونو د څار سازمان، د بخښنې نړۍوال سازمان، د حقوق پوهانو نړۍوال کمیسیون او نور دې هم ورته دريځ خپل کړي، چې طالبانو د بشريت ضد جنايتونه او جنسي ځورونې کړې او بايد د جرمونو د نړۍوالې محکمې لهخوا محاکمه شي.
په دغې خبرپاڼه کې وړاندیز شوی، چې د ملګرو ملتونو د بشري حقونو د شورا په روانه غونډه کې چې د اکټوبر تر دیارلسمې نیټې به دوام وکړي، د افغانستان لپاره د حساب ورکونې یو نوی میکانیزم جوړ شي چې په دغه هېواد کې د ټولو جرمونو په ځانګړې توګه د ښځو پر وړاندې د جرمونو اسناد او شواهد راغونډ کړای شي.
د بشري حقونو د څار سازمان د ښځو په مشرۍ د سازمانونو، د بشري حقونو سازمانونو، او د ښځو لپاره د انلاین زدهکړې او مسلکي پروګرامونو لپاره د تمویل او ملاتړ غوښتنه کوي.
په دې خبرپاڼه کې په افغانستان کې د ملګرو ملتونو د ځانګړي راپور ورکوونکي د ماموریت پر دوام او په افغانستان کې د یوناما د ماموریت پر غځولو هم ټینګار شوی دی.
