د ختیځې لیبیاچارواکي وايي، چې په لیبیا کې د سختو بارانونو له امله سیلابونه راوتلي، چې تر اوسه پکې ۵۳۰۰ کسان مړه شوي او له ۱۰۰۰۰ زیات ورک شوي دي.
رویټرز خبري اژانس د ختیځې لیبیا هوا پېژندنې د ادارې د مشر هیچیم ابو شکیوات په حواله ویلي، چې د د دانیل په نوم د مدیتراني طوفان او سختونو بارانونو له امله د دغه هېواد په بېلابېلو سیمو کې سیلابونه راوتلي دي.
راپور زیاتوي، چې په جبل الاحضر، المارج او درنا کې تر دې مهال د ښځو او ماشومانو په ګډون۵۳۰۰ تنه مړه شوي دي، په راپور کې راغلي چې د ژغورنې ډلې لا هم د یو شمېر خلکو په ژغورلو بوختې دي.
تر اوسه لا هم د دقیقې مرګ ژوبلې کره راپور نه شته؛ خو چارواکي وايي، چې ښايي د مړو شمېره له دې هم زیاته شي.
د دغو سیلابونو له امله ګڼو ودانیو ته هم زیان اوښتی، ځینې یې په بشپړ ډول له منځه تللي او ځینې یې نیمه ویجاړې شوي دي.
وړمه ورځ د لیبیا لومړي وزیر اسامه حماد هم د پېښې ځای ته سفر کړی او د قربانیانو له یو شمېر کورنیو سره یې هم لیدلي دي.
نوموړي پر نړۍوالو مرستندویه سازمانونو غږ کړی، چې په دغه سخت حالت کې دې د لیبیا د خلکو مرسته وکړي.
بل خوا د کډوالۍ د نړۍوال سازمان خبر ورکړی، چې په لیبیا کې د سیلابونو له امله د دغه هېواد د ختیځ نېږدې ۳۰ زره خلک بې کوره شوي دي.
یاد سیلابونه په لیبیا کې په وروستیو دېرشو کلونو کې بې ساري ګڼل شوي او ویل کیږي، چې د اوبو اندازه تر څوارلس فوټو پورې رسېدلي دي.