انتونیو ګوترېش: د افغان ښځو وضعیت به د ملګرو ملتونو د عمومي غونډې په اجنډا کې ځای ولري
د ملګرو ملتونو د عمومي اسمبلۍ د ۸۷مې غونډې په څنډه کې انتونیو ګوترېش د چهارشنبې په ورځ د افغانستان انټرنشنل خبریالې ته وویل، چې دی به د افغان ښځو د وضعیت مسله د هېوادونو له مشرانو سره شریکه کړي.
نوموړي زیاته کړه، چې د افغان ښځو وضعیت د هغه له جدي اندېښنو څخه یوه ده.
د ملګرو ملتونو په ودانۍ کې د افغانستان انټرنشنل خبریاله مریم رحمتي وايي، که څه هم د تېر کال په څېر به د دغې اسمبلۍ په عمومي غونډه کې د افغان ښځو د حقونو پر سرغړونو خبرې وشي؛ خو داسې نه ښکاري چې د افغانستان موضوع دې د غونډې د سر، سر موضوع وي.
د ملګرو ملتونو د اسمبلۍ ۸۷مه غونډه د وږي په اته ویشتمه نېټه په نيويارک ښار کې ترسره کېږي، چې موضوع يې د نړۍوال باور او پيوستون بيارغونه او د دوامدار پرمختګ د موخو د تر لاسه کولو لپاره د ۲۰۳۰ کال د اجنډا د پلې کولو په برخه کې د حکومتونو د کړنو ګړندي کول دي.
که څه هم افغانستان به سږ کال د نړۍوالو د بحثونو په سر کې نه وي؛ خو روانه اوونۍ د ملګرو ملتونو د بشري حقونو په شورا کې پر بشري حقونو په ځانګړې توګه د ښځو پر وضعیت خبرې وشوې.
په داسې حال کې چې غړیو هېوادونو تر ډېره پر طالبانو د بشري حقونو د سرغړونو له امله نیوکې هم کړې دي؛ خو د افغانستان لپاره د دغه سازمان ځانګړي استازي ریچارډ بېنټ د ښځو او قومي او مذهبي لږکیو د وضعیت خرابوالي ته په اشارې سره د هېوادونو لهخوا یې د جدي ګامونو د اخیستو غوښتنه وکړه.
