برېتانيا، فرانسې، جرمني او امريکا په يوې ګډه اعلاميه کې د اټومي انرژۍ نړۍوالې ادارې ته ويلي، که ايران خپلې ژمنې پوره نه کړي او د اټومي انرژۍ اړوند مسايل روښانه نه کړي؛ نو د ايران په اړه لا زياتو اقداماتو ته اړتيا ده.
دغو څلورو هېوادونو د پنجشنبې په ورځ (د وږي ۲۳مه) په یوې بیانیې کې ایران ته په خطاب کې لیکلي: «ایران باید له ځنډ پرته، د تورقوز اباد او ورامین په تړاو د اوسنیو اټومي مرکزونو او تجهیزاتو په اړه د باور وړ تخنیکي معلومات ورکړي».
ایسنا خبري اژانس په دې وروستیو کې په یوه راپور کې لیکلي، چې ایراني چارواکو دې ادارې ته ویلي چې په تورقوز اباد او ورامین کې دوو ځایونو ته د لاسرسي لپاره چمتو دي.
د اټومي انرژۍ نړۍوالې ادارې په وار-وار د تهران د یورانیمو د غني کولو د کچې په اړه اندېښنه څرګنده کړې، چې د دوی په وینا ۶۰ سلنې ته رسېدلې ده.
په دې وروستیو کې دې ادارې اعلان وکړ، چې تهران د ۱۱۴ کیلوګرامه غني شوي یورانیمو په ذخیره کولو سره لږ تر لږه د دوو اټومي وسلو لپاره د سونګ موادو د برابرولو وړتیا لري.
د دې میاشتې په پیل کې وال سټریټ ژورنال راپور ورکړ، چې ایران د اټومي وسلو لپاره د بډایه شوي یورانیمو په راټولولو کې د پام وړ کموالی راوستی دی، خو د اسلامي جمهوریت مرستیال او د دغه هېواد د اټومي انرژۍ د سازمان مشر دې ته په ځواب کې وویل، چې د یورانیمو غني کول د دې هېواد د پارلمان د مصوبو په اساس دوام لري.