د کډوالو نړیوال سازمان د شمېرو له مخې، له ۲۰۱۴میلادي کال راهیسي په ټوله نړۍ کې ۵۷ زره کسانو د کډوالۍ په لارو کې خپل ژوند له لاسه ورکړی دی. دغه سازمان په خپل نوي راپور کې لیکلي، چې په خطرناکو سفرونو کې د کډوالو مړه کیدل د منلو نه دي.
که څه هم کډوالي یوه نړیواله پدیده ده، خو زیاتره کډوال او پناه غوښتونکي د اسیايي او افریقايي هېوادونو دي چې امریکا او اروپا ته د رسیدو لپاره سختې ځکمنۍ لارې غوره کوي.
د کډوالو په چارو کې د ملګرو ملتونو عالي کمېشنرۍ اعلان کړی، چې په نړۍ کې ۱۱۰ میلیونه کسان په زور له خپلو کورونو بې ځایه شوي دي.
په دغه راپور کې، چې د چهارشنبې په ورځ (د غبرګولي۲۴ مه) خپور شو، ویل شوي چې د ټولو کډوالو او هغو کسانو چې نړیوال ملاتړ ته اړتیا لري، شاوخوا نیمايي یې یوازې د دریو هېوادونو سوریې، اوکراین او افغانستان دي.
د کډوالۍ د څپو له ډېریدو سره ځاني خطرونه هم زیات شوي دي.
څه موده وړاندې د کډوالو نړیوال سازمان د بشري تلفاتو په شمېر کې د اوه سلنه زیاتوالي خبر ورکړ او ویې ویل، چې د ۲۰۲۳میلادي کال له پیل راهیسې په منځنۍ اسیا او شمالي افریقا کې یو زرو ۴۴۹ تنه کډوال پر لارو مړه یا ورک شوي دي.