په ملګرو ملتونو کې د روسیې استازی وايي، اوکراین سږ کال له ملګرو ملتونو څخه ۱.۸۳ میلیارده ډالره بشري مرسته ترلاسه کړې چې د افغانستان له خلکو سره د شویو مرستو پرتله یو میلیارد ډالره زیاته ده.
واسیلي نبنزیا وویل، چې افغانان خپل ماشومان په نهیلۍ سره پلوري.
هغه د پنجشنبې په ورځ د ملګرو ملتو د امنیت شورا په غونډه کې ټینګار وکړ، چې دا یو ملیارد ډالره د افغانستان له عامو خلکو سره چې د امریکا او ناټو د ډیموکراسۍ خوند یې څکلی، ډېر زیات دي.
په ملګرو ملتونو کې د روسیې استازي زیاته کړه، چې ډېری افغانان لکه څنګه چې موږ پوهېږو اوس په نهیلۍ سره د خپل بدن د غړیو د خرڅلاو لپاره راضي کېږي او ځینې کورنۍ بیا خپل ماشومان د کورنۍ د نورو غړو د ډوډوۍ د برابرولو لپاره پلوري؛ خو زموږ ځینې همکاران نه غواړي، چې په دې اړه خبرې وکړي."
په افغانستان کې د طالبانو له واکمنۍ لږ وروسته واشنګټن پوسټ ورځپاڼې په یوه راپور کې لیکلي و، چې د افغانستان خلک تر بل هر وخته له بې وزلۍ سره لاس او ګریوان دي او هره ورځ په دې هېواد کې کم عمره نجونې پلورل کېږي.
د ملګرو ملتونو د خوړو نړۍوال پروګرام په روانه اونۍ کې یو ځل بیا اعلان وکړ، چې د افغانستان له خلکو سره د مرستې لپاره یو میلیارد ډالرو ته اړتیا لري.
دغه بنسټ چې تر اوسه یې د اړتیا وړ بودجه نهده ترلاسه کړې اعلان کړی،چې کولای شي له هرو پنځو اړمنو افغانانو څخه یوازې یوه ته خوراکي توکي ورسوي.