د اېټالیا لومړي وزیر له اروپايي ټولنې وغوښتل، د اړتیا په وخت کې دې یو ګډ "سمندري ماموریت" پیل کړي چې د شمالي افریقا د مدیترانې له سمندرګي څخه د کډوالو د تېرېدو مخه ونیسي.
د لامپډوسا په کوچنۍ ټاپو کې د پناه غوښتونکو د شمېر له زیاتوالي وروسته، جورجیا ملوني وویل چې په دې برخه کې به جدي اقدام وشي.
اغلې ملوني د جمعې په ورځ په خواله رسنیو کې په یوه ویډیويي پیغام کې وویل، چې هغې د اروپا د شورا مشر چارلېز مېشل ته په یوه لیک کې لیکلي، چې د اکټوبر په میاشت کې د کډوالو موضوع د اروپایي ټولنې د سرمشریزې په اجنډا کې دې ځای په ځای کړي.
د نویو کډوالو د شمېر زیاتېدل چې د جورجیا ملوني لپاره په یوه لوی سیاسي سرخوږی بدل شوی وایي چې، "زه د اروپایی ټولنې د بېړني ماموریت غوښتنه تکراروم چې د کډوالو د بېړیو د وتلو مخه ونیسي."
د جورجیا ملوني په مشرۍ د اېټالیا ښي اړخي حکومت د تېر کال په اکټوبر میاشت کې رامنځته شو او ژمنه یې وکړه، چې د ناقانونه کډوالۍ مخه به ونیسي؛ خو سږ کال تر اوسه شاوخوا ۱۲۶ زره پناه غوښتونکي اېټالیا ته رسېدلي دي.
دغه شمېر په ۲۰۲۲ کال کې د ورته شمېرې نږدې دوه برابره دی.
ډېری کښتۍ چې اېټالیا ته ننوځي له تونس څخه تیریږي.
د جولای په میاشت کې اغلې ملوني له اروپايي ټولنې سره د مرستې په بدل کې د شمالي افریقا له دغه هېواد سره یوې هوکړې ته د رسېدو په برخه کې مرسته وکړه، چې د کډوالو د بېړیو د تېرېدو مخه ونیسي؛ خو تر اوسه دغه هوکړه عملي شوې نهده.
په هغه پیغام کې چې نوموړې د جمعې په ورځ خپور کړ له اروپايي کمیسیونه یې وغوښتل، چې سمدستي دې ټونس ته ۲۵۰ میلیونه یورو ورکړي.
