برېټانیا د جمعې په ورځ د مهسا امیني د وژل کېدو د لومړۍ کلیزې په مناسبت د ایران د کلتور او اسلامي لارښود وزیر د هغه مرستیال، د تهران ښاروال او د ایران د پولیسو پر ویاند بندیز ولګاوه.
بريټانيا وايي، د دغو بنديزونو په لګولو سره يې د ايران د ښځو تر څنګ د درېدو پيغام اعلان کړ.
برېټانيا د ایران د څلورو چارواکو په ګډون، د اروان کلاوډ په انترنټي شرکت هم چې د ایران له حکومت سره یې د انټرنېټ د سانسور په لړ کې همکاري کوله، بندیز لګولی دی.
متحده ایالاتو هم پر دې شرکت مخکې بندیز لګولی و.
پر دغو کسانو د سفر، په برېټانیا کې د دوی د شتمنیو کنګلېدلو او له برېټانوي شرکتونو سره د سوداګرۍ بندیزونه لګېدلي دي.
د برېټانیا د بهرنیو چارو وزیر جیمز کلورلي د جمعې په ورځ په یوې بیانیه کې وویل، چې دغه بندیزونه په ایران کې د حجاب د جبري قانون پر پرېکړه کوونکو دي او په دې تړاو امریکا، کاناډا او اسټرالیا له ورته اقدامونو سره همغږي دي.
ښاغلي کلورلي وویل: "د ایران د ظالمانه قوانینو په مسؤولینو دغه بندیزونه یو څرګند پیغام ورکوي، چې دغه هېواد او ملګري به یې د ایراني مېرمنو ترڅنګ ودرېږي او هغه ظلمونه به وغندي، چې دوی یې په خپلو خلکو کوي."
۲۲ کلنه ایرانۍ کردۍ نجلۍ مهسا امیني د ۱۴۰۱ کال د وږي میاشتې په ۲۵مه نېټه د جبري حجاب له قوانینو څخه د سرغړونې په تور د اسلامي جمهوریت د ارشاد ګزمې په توقیف کې مړه شوه.
د هغې وژنې د حکومت ضد اوږده لاریونونه راوپارول.
د ایران د بشري حقونو سازمان د مهسا امیني د مړینې د یو کلنۍ په درشل کې اعلان وکړ، چې په تېر یوه کال کې د ۶۸ ماشومانو او ۴۹ ښځو په ګډون ۵۵۱ لاریون کوونکي وژل شوي دي.
