د پاکستان د خېبر پښتونخوا د بنو په جاني خېل سیمه کې یو شمېر قومي مشرانو او ځوانانو د یوه لاریون په ترڅ کې د پاکستان پر پوځ نیوکه وکړه، چې د عملیاتو پر مهال ولسي وګړي ځوروي او یو شمېر لارې یې تړلې دي.
په تېر اګسټ میاشت کې د پاکستاني پوځ پر پوځي موټرو د ځانمرګي برید وروسته د بنو په جاني خېلو کې د پوځ له خوا چاڼیز عملیات پیل شوي او د دغې سیمې امنیتي تدابیر یې سخت کړي دي.
د جاني خېلو یو شمېر مشران په یوې اعتراضیه غونډې کې وايي، چې د دوی په سیمه کې د پوځ له خوا د پیل شويو عملیاتو له پيله راپه دېخوا یې د ځینو سیمو لارې تړل شوي، کاروبارونه یې خراب دي او پوځ ورسره نادرست چلند کوي.
حاجي ملا ګل یو له هغو قومي مشرانو څخه دی، چې ورور یې په هدفي برید کې وژل شوی، نوموړی د پوځ پر ځواکونو نیوکه کوي، چې پر دوی له شوي ځانمرګي برید وروسته یې ټولې لارې تړلې دي.
هغه زیاته کړه: “هره ورځ زموږ ځوانان وژل کیږي خو پوځ غږ نه کوي، مګر کله په پوځ خودکش وشو نو اوس یې ټولې لارې بندې کړي دي، عام خلک ځوروي”.
دغه اعتراض کوونکي زیاتوي، چې د پوځ له خوا بازارونه تړل شوي او په بېلابېلو سیمو کې یې د څار پوستې جوړې کړي دي.
له دې وړاندې د بنو یو شمېر خلکو په دغه سیمه کې د امن د غوښتلو په پار لسګونه اعتراضیه غونډې کړې وې، خو ناامني ورځ تر بلې پیاوړې شوې ده.
وروستي دوه کلونه د بنو د جاني خېلو لپاره خونړي کلونه وو، په یاده سیمه کې د پاکستاني طالبانو د تحریک هڅې ګړندۍ شوي او د راپورونو له مخې یوازې په تېرو دوو کلونو کې پکې ۹ ځانمرګي بریدونه شوي دي.