ایران د جمعې په ورځ، له عراق سره د جګړې د ۴۳مې کلیزې په مناسبت، د نړۍ د تر ټولو اوږد واټنه ډرون او له غږ چټکو بالستیک توغندیو په ګډون خپل پوځي تجهیزات نندارې ته وړاندې کړل. ایراني رسنیو ویلي، چې د دې ډرون عملیاتي واټن دوه زره کیلومتره دی او ۲۴ ساعته الوت کولای شي.
د ایراني رسنیو د راپورونو له مخې، دې پوځي پرېډ یا رژه کې چې په ژوندۍ بڼه خپره شوه، د «مهاجر، شاهد او ارش» ډرون الوتکې نندارې ته وړاندې شوې.
د ایران اسلامي جمهوریت تېره میاشت ویلي وو چې د مهاجر ۱۰ په نوم یې یوه پرمختللې بې پیلوټه الوتکه جوړه کړې چې دوه زره کیلومتره واټن وهلی شي.
سربیره پردې، مهاجر ۱۰ د ۲۴ ساعتونو لپاره الوتنه کولی شي او تر ۳۰۰ کیلوګرامه کارګو لیږدوي، چې د اوسني مهاجر ۶ډرون څخه یې ظرفیت دوه چنده ډېر دی.
امریکا پر ایران تورن لګولی چې مهاجر ۶ ډرون الوتکې یې روسیې ته ورکړي چې د اوکراین په جګړه کې یې وکاروي.
واشنګټن د سې شنبې په ورځ پر ایران د بندیزونو د زیاتیدو یو لامل روسیې ته د دغو بې پیلوټه الوتکو سپارل وباله.
تهران روسیې ته د دغو بې پیلوټه الوتکو استول ردوي.
د جمعې په ورځ ایران خپل بالستیک او هایپرسونیک توغندي هم نندارې ته وړاندې کړل
د ایران او عراق جګړه د ۱۳۵۹لمریز کال د وږي په ۳۱مه (د ۱۹۸۰میلادي کال د سپتمبر ۲۲) پیل شوه او اته کاله یې دوام وکړ.
دا جګړه چې له اقتصادي پلوه ویجاړونکې وه او لږ تر لږه نیم ملیون کسان پکې ووژل شول، بالاخره د ایران له خوا د ۱۳۶۷لمریز کال د زمري په میاشت کې د ملګرو ملتونو د امنیت شورا د ۵۹۸ پریکړه لیک په منلو سره پای ته ورسیده.
