د کاناډا لومړي وزیر له هنده غوښتي، چې په کولمبیا بریټش کې د بېلتون غوښتونکي سېک د وژنې په اړه په څېړنو کې همکاري وکړي. جسټن ټروډو ټینګار کړی، کاناډا کره شواهد لري چې د ۴۵ کلن هاردیپ سېنګ نجار په وژلو کې د هند حکومت لاس لري.
له دې سره ښاغلي ټروډو روښانه کړه، چې کاناډا به په دې اړه اسناد خپاره نه کړي.
د کاناډا لومړي وزیر په نیویارک کې د ملګرو ملتونو د اسمبلۍ د ۷۸مې غونډې په څنډه کې د یوې خبري غونډې په ترڅ کې وویل:« په دې کې شک نه شته، چې هند یو مخ پر ودې هېواد دی او یو داسې هېواد دی چې موږ باید ورسره کار ته دوام ورکړو او موږ د ګډوډۍ یا ستونزو د جوړولو په لټه کې نه یو." خو موږ د قانون د حاکمیت او د کاناډایانو د ساتنې په برخه کې دقیق یو.»
ښاغلي ټروډو له نوي ډیلي څخه وغوښتل، چې د "حقیقت" په موندلو کې همکاري وکړي.
هندي - کاناډایي بېلتون غوښتونکی هارډیپ سېنګ د جون په میاشت کې د کاناډا په بریټش کولمبیا کې ووژل شو.
نوموړی د هند په پنجاب ایالت کې د سېکانو لپاره د خپلواک دولت غوښتونکی و.
د هارډیپ سېنګ نجار په وژنه کې د نوي ډیلي د لاس لرلو په اړه د هند په وړاندې د کاناډا تورونو د دواړو هېوادونو ترمنځ په بې ساري توګه ترینګلتیاوې رامنځته کړې.
تر دې مخکې هند په کاناډا کې له خپلو وګړو او هغو کسانو چې دغه هېواد ته د سفر پلان درلود وغوښتل، چې له احتیاطه کار واخلي.
نوي ډیلي کاناډایي وګړو ته د ویزو ورکول هم ځنډولي دي.
د دغه کړکېچ په ترڅ کې، هند او کاناډا هر یوه تراوسه د یو بل ډیپلوماټان له خپلو هېوادونو څخه اېستلي دي.
