د پاکستان په پنجاب صوبه کې جارواکي وايي، له تمځي سره نږدې له ولاړ اورګاډي سره د بل هغه د ټکر له امله شل کسان ټپي شوي دی. دا اورګاډی د پنجاب له میاولې د دغې صوبې مرکز لاهور ښار ته روان و چې د شیخپورې په ستار شاه کلا تمځي کې له ولاړ ګاډي سره ټکر شو.
ویل کېږي اورګاډی د پټلۍ پر داسې کرښه تللی چې لا د مخه بل اورګاډی پرې ولاړ و.
د پاکستاني رسنیو د راپور له مخې، د دې پېښې له امله د پټلۍ څلورو مسوولانو دندې ځنډولې دي.
پرون هم له ستارشاه کلا سره د بارګاډي څلور ډبې یا کوټې له پټلۍ غړېدلې وې.
د پاکستان سرپرست لومړي وزیر د دې هېواد په پارلماني ټاکنو کې د عمران خان ګوند د ناکامولو لپاره د پوځ د ممکنه لاسوهنې احتمال رد کړ.
انورالحق کاکړ اسوشېټډ پرس خبري اژانس ته وویل، د ټاکنو کمیسیون رایې شمېري، نه پوځ.
ښاغلي کاکړ وویل چې عمران خان په خپله واکمنۍ کې د ټاکنو د کمیسیون مشر وټاکه او پوښتنه یې وکړه چې ولې هغه کس چې د خان لخوا ټاکل شوی د هغه پر ضد کار وکړي.
تېره میاشت د شهباز شریف له استعفا وروسته انورالحق کاکړ د پاکستان د سرپرست صدراعظم په توګه وټاکل شو چې د دغه هېواد د راتلونکو انتخاباتو څارنه وکړي.
د پاکستان د انتخاباتو کمیسیون د پنجشنبې په ورځ اعلان وکړ، چې انتخابات به د جنوري میاشتې په وروستې اونۍ کې ترسره شي.
ټاکلې وه چې دا ټاکنې په نومبر میاشت کې ترسره شوې وای، خو د نویو ټاکنیزو حوزو د جوړولو له امله وځنډول شوې.
ښاغلي کاکړ اسوشیټیډ پرس ته وویل، چې کله کمیسیون د ټاکنو لپاره دقیقه نېټه وټاکي، د هغه حکومت به «ټولې مالي مرستې، امنیتيی او نورې اړوند اړتیاوې چمتو کړي.»
پاکستان د ۲۰۲۲م کال د اپرېل له میاشتې راهیسې چې عمران خان په پارلمان کې د نه باور رایې له امله له واکه لرې شو، له سیاسي کړکېچ سره مخ دی.
عمران خان د اګست میاشتې په لومړیو کې د فساد په تور ونیول شو او په درې کاله بند محکوم شو. که څه هم وروسته د هغه د بند سزا وځنډول شوه، خوهغه اوس هم په توقیف کې دی.
سربیره پردې، پاکستان د خپل هېواد په تاریخ کې له بد اقتصادي ناورین سره مخ دی او هڅه کوي چې د اوړي له ویجاړونکي سیلابونو څخه چې په ترڅ کې یې څه کم ۱۷۰۰ کسان یې مړه او په میلیونونه کورونه او فارمونه یې ویجاړ کړي، څخه ځان روباسي.
د پاکستان سرپرست لومړي وزیر د ملګرو ملتونو سرمشریزه کې یو ځل بیا وویل چې له افغانستان څخه تحریک طالبان پاکستان داعش او نور وسلوالې ډلې د پاکستان پرضد بریدونه کوي. انوارالحق کاکړ دې سرمشریزې ته وینا کې له طالبانو بیا وغوښتل چې د ورته بریدونو په مخنیوي ور سره پرېکنده مرسته وکړي.
نوموړي په ورته مهال ومنله چې په دې برخه کې طالبان ور سره ملاتړ او همغږي لري او هم پاکستان پخپله خاوره کې د دې وسلوالو پرضد اړین ګامونه پورته کړي.
د هغه په خبره، په پاکستان کې د وسلوالو د بریدونو مخنیوی او د دې ډلې ځپل د اسلام اباد لومړیتوب دی.
ښاغلي کاکړ په افغانستان کې او له دغه هېواد بهر ته د پراخېدونکې هر ډول ترهګرۍ ځپل هم خپل لومړیتوب وباله.
خو طالبانو د پاکستاني چارواکو دا ډول څرګندونې تل رد کړې دي او ویلي یې دي چې دوی هیچا ته هم اجازه نه ور کوي چې افغان خاوره د بل چا پرضد وکاروي.
طالبان دا هم وايي، چې په پاکستان کې وسلوالې ډلې په هغه هېواد کې خپل بریدونه پلانوي.
د پاکستان لومړي وزیر د ملګرو ملتونو غونډې ته په وینا کې وویل، چې د نړیوالې ټولنې په څېر د نجونو د زدکړو او د ښځو د کار په هکله ورته اندېښنه لري.
نوموړي په ورته مهال له افغانستان سره د انساني مرستو پر دوام ټینګار وکړ او زیاته یې کړه: «پاکستان د بې وزله افغان وګړو سره چې افغان ښځې او نجونې تر ټولو زیانمنې دي د بشري مرستو د دوام او همدارنګه د افغانستان د اقتصاد د بیا رغولو او له منځنۍ اسیا سره د ارتباطي پروژو د پلي کولو ملاتړ کوي.»
د مالیزیا لومړي وزیر انور ابراهیم هم په افغانستان کې پر کړکېچن بشري وضعیت اندېښنه ښودلې او له طالبانو یې غوښتي، چې د ښځو او نجونو پر وړاندې دې د توپیري چلن سیاست پرېږدي.
انور ابراهیم د جمعې په ورځ ملګرو ملتونو ته په خپله وینا کې وویل، د تعليم له حقه انکار د اسلامي لارښوونو خلاف عمل دى.
په ملګرو ملتونو کې له ښځو او نجونو سره د طالبانو د جنستي توپیر په تړاو ناسته هم جوړه شوې وه چې پکې د مختلفو هېوادونو استازد ګډون درلود.
طالبانو لا دې غونډې ته په غبرګون کې څه نه دي ویلي، خو پر ښځو ټول لګېدلي بندیزونه یې د اسلام له مخې بللي دي.
د پاکستان سرپرست لومړي وزیر انور حق کاکړ خبرداری ورکړ چې د «هندو ملتپالنې» د سیاست تر شا «کرکجن حقیقت» نړۍ د جګړې اور ته اچولی شي. ښاغلي کاکړ دغه څرګندونې د سيکانو د يوه مشر د وژلو په تړاو د هند پر وړاندې د کاناډا د وروستيو ادعاګاوو په اړه وکړې.
د کاناډا او هند ترمنځ کړکېچ د جون په میاشت کې د کاناډا په بریټیش کولمبیا کې د هندي - کاناډایي بېلتونپال هردیپ سینګ نجار له وژل کېدو وروسته زیات شو.
د سیکانو دغه مشر د هند د پنجاب ایالت د سیکانو لپاره یو خپلواک هېواد غوښت.
د کاناډا لومړي وزیر له هند څخه وغوښتل چې د دغه سک مشر د وژنې په تحقیقاتو کې همکاري وکړي.
جسټین ټروډو ټینګار وکړ، چې کاناډا یوه معتبره ادعا لري چې د ۴۵ کلن هردیپ سینګ نجار په وژنه کې د هند د حکومت لاس ښیې.
هند په دې تړاو هر ډول لاس لرل رد کړي.
خو انورحق کاکړ د سیکانو د بېلتونپال مشر «بې ګناه» او «شهید» بللی او ویلي یې دي چې د یوه بې ګناه کس وژل «لوی جنایت» دی.
ښاغلی کاکړ په نړیواله ټولنه کې د «هندو ملتپالنې» د مخ په زیاتیدونکي څپې په اړه اندیښنه لري.
هغه وويل: «موږ به [دا موضوع] په مختلفو ټولنو کې مطرح کړو، دا نه چې موږ غواړو د هند پر ضد پروپاګند خپور کړو، بلکې د دې لپاره چې د هندو ملتپالنې سياسي اجنډا تر شا د کرکې وړ واقعيت دی چې فاشيزم او شوونیزم کې ژورې ريښې لري.»
د پاکستان لومړی وزیر خبرداری ورکوي چې دا پدیده دومره خطرناکه ده چې ټوله سیمه او نړۍ د جګړې په اور کې اچولی شي.
هغه ټینګار وکړ، چې د دې موضوع روښانولو ته دوام ورکوي او هر چیرته چې ورته فرصت پیدا شو په اړه یې خبرې کوي.
د هغه څه پر بنسټ چې د پاکستان لومړی وزیر ادعا کوي، هندو ملتپالنې (هندوتوا) په سیمه او په ځانګړې توګه بلوچستان یې اغېزمن کړی دی.
دغه لوړپوړی پاکستاني چارواکی ادعا کوي، چې د خپلو د ادعاوو لپاره شواهد لري، چې په هغه کې د هند د پوځ د یوه لوړپوري افسر اعتراف هم شته.
د دې تر څنګ انورحق کاکړ له ترهګرۍ سره د مبارزې په برخه کې پاکستان «ډېر پیاوړی» وباله او ویې ویل: «د ترهګرۍ د زیاتوالي په برخه کې له ګاونډیو هېوادونو لکه افغانستان سره نږدې همغږي او پرانیستې اړیکې لري.»
عوامي نشنل ګوند د بلوچستان په چمن کې د جمعې په ورځ په پاکستان کې د افغان کډوالو د نیولو او ناوړه امنیتي حالت پرضد مظاهره وکړه. دوی د پاکستان له حکومت وغوښتل چې د افغانانو د نیولو لړۍ ودروي او د دې ګوند د وژل شوي غړي ارباب غلام کاسي د وژنې په هکله کمېسون جوړ کړي.
د عوامي نشنل ګوند مشرانو، پلویانو او عامو خلکو د جمعې په ورځ له کندهار سره پر پوله چمن ښارګوټي کې له مظاهرې وروسته غونډه وکړه.
په دې غونډه کې د ګوند صوبايي مشر اصغر خان اڅکزي په پاکستان کې د افغانانو نیول وغندل او له اسلام اباد یې وغوښتل چې نیول شوي افغانان خوشي کړي.
نوموړي دا هم وویل، چې پاکستان دې د افغانانو د اېستلو پرېکړه بېرته واخلي او له افغانستان سره لارې دې هم نه بندېږي.
د عوامي نشنل ګوند مشرانو د دې ګوند د مخکښ غړي ارباب غلام کاسي د وژنې په هکله د عدالتي کمېسیون د جوړېدو غوښتنه وکړه.
ارباب غلام کاسي تېره سې شنبه د بلوچستان د مرکز کوټې ښار ته څېرمه په کوچلاغ کې مړه وموندل شو.
پولیسو ویلي نوموړی یو ډز سر ته لګېدلی دی.
تراوسه کومې ډلې د هغه د وژلو مسوولیت نه دی منلی.
د پاکستان پټلۍ وزارت د دغه هېواد د مشهور او ډېر چټک اورګاډي شالېمار ایکسپرېس د فعالیت بندولو پرېکړه کړې ده. شالېمار د پنجاب له مرکز لاهور څخه تر کراچۍ تګ راتګ کوي، خو ویل کېږي اوس یې دا چلښت د ګټې په ځای تاوان لري.
سرچینو جیو نیوز ته ویلي، شالېمار د ورځې دوه میلیونه روپۍ تاواني کېږي.
په پاکستان کې د اقتصادي کړکېچ زیاتېدو او د سونتوکو د بیې ډېرېدو سره د اورګاډو کرایې هم جګې شوې دي، خو مالومه نه ده چې دا اورګاډی په څه دلیل هره ورځ تاوان کوي.
د پاکستان پټلۍ وزارت د ۲۰۱۰ کال په جولای کې هم دا ګاډی درولی و، خو له ۱۹ میاشتو وروسته یې بیا د ۲۰۲۱۲ کال د فبرورۍ په وروستیو کې د یوې خصوصي کمپنۍ په همکارۍ پټلۍ ته وباسه.
شالېمار ایکسپرېس د د کراچۍ او لاهور ترمنځ ورځانه چلېږي او د دې ښارونو ترمنځ ۱۲۱۴ کیلومتره لار په ۱۶ ګړیو کې وهي.
د پاکستان د یوه پخواني پوځي مشر جنرال ضیاالحق په واکمنۍ کې پر ۱۹۷۹ کال دې اورګاډي فعالیت پیل کړی دی.