د پاکستاني طالبانو ډله وايي، د بلوچستان په مستونګ او د پښتونخوا د هنګو د جمعې ورځې بریدونه دوی نه دي کړي. په مستونګ کې د میلاد النبي مراسمو کې ځانمرګي تر پنځوسو ډېر کسان ووژل او همدومره یې ټپیان کړل. د هنګو په دوابه کې هم د پولیسو جومات کې ځانمرګی برید شوی دی.
پاکستاني طالبانو رسنیو ته په یوه اعلامیه کې ویلي، په دې دواړو بریدونو خواشیني ښودلې ده او وايي په کلکو ټکو یې غندي.
دا ډله زیاتوي چې په جوماتونو، مدرسو، ښوونځیو او عامه ځایونو کې بریدونه د دوی کار نه دی.
د جمعې په ورځ د بلوچستان په مستونګ کې د میلادالنبي په مراسمو کې ځانمرګي ۵۷ کسان ووژل او تر شپېتو یې ټپیان کړل.
دا ډول د جمعې لمانځه کې د هنګو د دوبې د پولیسو تاڼې دورازه کې یو ځانمرګی برید شوی او ور پسې بل ځانمرګي د پولیسو جومات ته ځان رسولی دی.
ځايي چارواکي وايي، په دې پېښه کې درې کسان وژل شوي او ۱۳ ټپیان دي.
لا هم کومې ډلې د دې دواړو بریدونو مسوولیت نه دی منلی.
