د طالبانو د سټنډرډ اداره وايي، ایران ته یې له ۱۰ زره ټنو زیاته اوسپنه بیرته ور ګرځولې ده
د طالبانو د سټنډرډ ادارې د شنبې په ورځ -د تلې په ۸ مه اعلان وکړ، چې د اسلام کلا له پولې یې څه باندې ۱۰ زره ټنه وارداتي اوسپنه ایران ته ور ګرځولې ده. دغه اداره وايي، چې دا اوسپنه په معیار برابره نه وه.
دغه اداره وايي، په دغو اوسپنیزو توکو کې ګاډر، ټېرنګ او نور ودانیز توکي شامل و، خو د سټنډرډ ادارې د مسلکي انجنيرانو له خوا له لابراتواري ازموينو وروسته یې پايله منفي وه او بېرته ورلیږل شول.
د طالبانو دغې ادارې ویلي چې د ساختماني موادو د کیفیت او ټیکاو د کنټرول په برخه کې «جدي او پرېکنده» اقدام کوي.
په تېرو دوو کلونو کې، د طالبانو د سټنډرډ ادارې بیلابیل وارداتي توکي، په ځانګړې توګه ټیټ کیفیته تېلي محصولات د ایران په ګډون ګاونډیو هېوادونو ته بیرته ورلیږلي.
د سیمې له هېوادونو څخه د بی کیفیته توکو واردول د افغانستان د تېر حکومت او اوس مهال د طالبانو لپاره له مهمو ننګونو څخه دی.