جې شنکر: په کاناډا کې مو ډیپلوماټان د «تاوتریخوالي او وېرې» په فضا کې ژوند کوي
په کاناډا کې د سېک سیاستوال له وژنې وروسته د ترېنګلتیاوو په دوام د هند د بهرنیو چارو وزیر وایي، په کاناډا کې ېې ډیپلوماټان د «تاوتریخوالي او وېرې» په فضا کې ژوند تېروي. جې شنکر ویلي، په کاناډا کې د ډيپلوماټانو د ګواښلو او ډارولو لپاره د بیان ازادي شته؛ خو دا د منلو نه ده.
په وروستیو کې د کاناډا لومړي وزیر وویل، چې هېواد یې «معتبره شواهد» په لاس کې لري چې ښیي د جون په میاشت کې د سېک بېلتونپال هاردېپ سېنګ نېجار په وژنه کې د هند حکومت لاس لري.
هند دغه ادعاوې ردې کړې او د هغې په دوام، د ډیلي او اوتاوا ترمنځ بې مخینې ترېنکلتیاوې پیل شوې.
هاردېپ سېنګ نېجار د «خالصتان» غورځنګ مخکښ کس و، چې د هند د پنجاب سېکانو لپاره یې د یوه خپلواکه هېواد د جوړېدو غوښتنه کوله.
د هند دننه دغه غورځنګ وځپل شو او د دغه هېواد حکومت ښاغلی نېجار د ترهګر په توګه پېژانده.
کاناډا چې د هند ډېری سېکانو ته یې پناه ورکړې ده، دغه غورځنګ په کې فعال دی او تراوسه یې څو اعتراضي راټولېدنې ترسره کړې دي.
تر دې وړاندې هند اعلان وکړ، چې له کاناډا سره د هاردېپ سېنګ نېجار د وژنې په څېړنو کې همکارۍ ته چمتو دی.
