د مستونګ او هنګو د چاودنو په تړاو د حامد کرزي او طالبانو غبرګون
د افغانستان پخواني ولمشر حامد كرزي د خیبرپښتونخوا په هنگو او د بلوچستان په مستونگ سیمو کې چاودنې چې له امله یې ولسي خلکو ته درنه مرګژوبله اوښتې غندلې او دغه کړنې یې غیر اسلامي او د بشر ضد ګڼلې دي.
د هېواد پخواني ولسمشر په خپلې اېکس پاڼه لیکلي، «د لوی خدای له درباره د دغو غمجنو پېښو قربانیانو ته د جنت، کورنیو ته یې د جمیل صبر او ټپیانو ته د سملاسي روغتیا دعا کوم.»
د دې ترڅنګ د طالبانو د بهرنیو چارو وزارت هم په خپلې اېکس پاڼه دغه پېښه غندلې ده.
دا په داسې حال کې ده، چې پاکستان په دغه هېواد کې د وروستیو تاوتریخوالو د پړې ګوته طالبانو ته نیسي.
د دې سره تېره ورځ د طالبانو د بهرنیو چارو وزارت سیاسي مرستیال عباس ستانکزي د یوې غوڼډې پرمهال د نوم نه اخیستو پرته وویل:« هر هېواد کې ستونزې شته؛ خو ښه خبره دا ده، چې هر څوک دې خپلې ستونزې په خپله حل کړي او بل چا ته دې د ملامتيا ګوته نه نيسي.»
هغه زیاته کړه:« د نړۍوالو قوتونو د خوشحاله کولو لپاره پر افغانستان تور لګول د حل لار نه ده او ګاونډي هېوادونه بايد له دې کاره لاس واخلي، ځکه په دې سره د دواړو هېوادونو ترمنځ اړيکي ترينګلې کېږي.»
له هغې وروسته د پاکستان د بهرنیو چارو وزارت دا ومنله، چې افغان طالبانو د ټيتيپي شاوخوا ۲۰۰ غړي نیولي دي.
