طالبانو ته نږدې وېبپاڼه المرصاد وايي، دې ډلې د بلوچستان د برید او ورته نورو بریدونو معلومات او په دې کې د لاس لرونکو نومونه د پاکستان له استخباراتو سره شریک کړي وو. دا رسنۍ د پاکستان حکومت تورنوي چې دغو معلوماتو ته یې پاملرنه نه ده کړي او نه یې د دې بریدونو مخه نیولې ده.
وړمه ورځ د بلوچستان په مستونګ کې د میلادالنبي پر مراسمو په ځانمرګي برید کې ۵۹ کسان ووژل او تر شپېتو ټپیان شول.
د پاکستان طالبانو ډلې دا برید غندلی او بلې وسلوالې ډلې یې مسوولیت نه دی منلی.
د پاکستان د کورنیو چارو سرپرست وزیر سرفراز بګټي پرون په کوټه کې وویل، چې هند د بلوچستان بریدونو کې لاس لري.
خو المرصاد وايي، باوري شواهد ښيي چې پاکستان په افغانستان او سیمه کې د یوه نیابتي سازمان په توګه د داعش د راپورته کولو او تقویه کولو پروژه پرمخ بیايي.
المرصاد چې په څو ژبو د داعش پرضد نشرات کوي، تېره ورځ د پاکستان بلوچستان وروستیو خونړیو بریدونو په اړه د « پاکستان خپل ولس د داعش پر لاس وژني» ترسرلیک لاندې یو راپور خپور کړ.
په دغه راپور کې ادعا شوې چې،له ډېر وخت راهیسې په قبایلي سیمو کې د پاکستان د حکومت په مستقیم ملاتړ د داعش لپاره د جلب او جذب لړۍ روانه ده.
دوی په خپل راپور کې زیاتوي چې بلوچستان په دغه هیواد کې د داعش لپاره یوه لویه او بې قانونه سیمه شمېرل کیږي.
تر دې مخکې هم داعش په بلوچستان کې د ځینې بریدونو مسوولیت منلی چې وروستی یې تېره میاشت د جمعیت علمای اسلام پر صوابي مشر حافظ احمد و.
داعش د مستونګ برید په هکله لا څه نه دي ویلي.
