افغانستان د هند د کرېکټ ملي لوبډلې پخوانی لوبغاړی اجی جدېجا د افغانستان مشاور روزونکی وټاکه. د افغانستان کرېکټ بورډ په خپلې اېکس پاڼه خبر ورکړ، چې اجی جدېجا د ملي لوبډلې د سلاکار روزونکي په توګه د نړۍوال جام لپاره د افغانستان کرېکټ ملي لوبډلې سره مل شوی دی.
اجی جدېجا په ۱۳ نړۍوالو لوبو کې د هندوستان ملي لوبډلې لوبډلمشري کړې، چې ۸ لوبې یې ګټلي او ۵ یې بایللې دي.
اجی جدېجا تر ۲۰۰۰ کاله پورې د هند د ملي لوبډلې غړی و او د هند مډل ارډر توپ وهوونکی هم و، چې سلګونه نړۍوالې لوبې یې کړې دي.
ورته مهال د اجی جدېجا غړیتوب د کرېکټ د شنونکو له پراخ هرکلي سره مل شو.
د افغانستان د کرېکټ برخې شنونکي هیلهمن دي، چې په هندوستان کې د نړۍوال جام په درشل کې لوبډلې ته د اجی جدېجا راوستل به پر لوبډلې مثبت اغېز وکړي؛ ځکه چې هغه د هند له لوبغالو او هوا سره پوره بلدتیا لري.
اجی جدېجا د هند په کورنیو سیالیو کې د ډیلي لوبډلې روزونکی هم پاتې شوی او په وروستیو کې بیا د لوبو مبصر شو.
پر ښاغلي جدېجا په لوبو کې د فساد تور هم لګول شوی او د یوې مودې لپاره له بندیزونو سره هم مخ و؛ خو دا ټول هغه تورونه دي، چې ښاغلي جدېجا رد کړي وو.
