پاکستاني چارواکي وايي، د اکتوبر په لومړیو کې بې قانونه کډوالو ته د ضرب الاجل تر ټاکلو راهیسې له یو لک څلوښت زرو ډېر کډوال له دغه هېواد وتلي دي، چې ډېری یې افغانان دي. پاکستاني چارواکي وايي، نن د دې نېټې پوره کېدو سره یې د پاتې بې قانونه کډوالو د ټولولو او اېستلو هڅې پیل کړې دي.
په خیبر پښتونخوا کې ځايي کمېشنر نصیر خان نن رویټرز ته ویلي، چې تر یو لک څلور زرو ډېر افغانان د تورخم له لارې خپل هېواد ته ستانه شوي دي.
د هغه په خبره، په دوی کې ځینې له ۳۰ کلونو راهیسې بې سنده پاکستان کې اوسېدل.
د نوموړي په خبره، نامالوم شمېر افغانان هم د چمن له لارې خپل هېواد ته ستانه شوي دي.
پاکستاني چارواکي وايي، په دغه هېواد کې تر یو میلیون او اوو لکو بې قانونه کډوال اوسېږي.
دغو کډوالو ته د ټاکلې نېټې تر پوره کېدو وروسته نن د پاکستان په سترو ښارونو، کراچۍ، اسلام اباد او پېښور کې د بې قانونه مهاجرو د نیولو او افغانستان ته د لېږدولو لپاره عملیات پیل شوي دی.
