د افغانستان لپاره د ترکیې نوي سفیر د طالبانو د کورنیو چارو له وزیر سره په ناسته کې ویلي، چې ترکیه او افغانستان داسې ګډ ارزښتونه لري، چې د اړیکو د ټینګ بنسټ یې جوړیږي او ترکیه په ستونزمنو حالاتو کې د افغانانو تر څنګ درېدل خپله وجیبه بولي.
د طالبانو تر کنټرول لاندې باختر اژانس د راپور له مخې؛ د طالبانو لپاره د کورنیو چارو سرپرست وزیر سراج الدین حقاني د لړم په ۱۷مه د افغانستان لپاره د ترکیې نوي سفیر جنک اونال سره په کتنه کې ویلي، چې دا دواړه هېوادونه تاریخي ژورې رېښې لري او دواړه مسلمان ملتونه په سختو او ښو ورځو کې د یو بل تر څنګ پاتې دي.
اونال وویل چې د بشري مرستو اتم اورګاډی هم افغانستان ته راروان دی، چې په رارسېدو سره به یې په افغانستان کې ګڼ شمېر خلک له بشري مرستو برخمن شي.
د دغې لیدنې په تړاو تر دې مهاله د ترکیې سفارت په رسمي ډول څه نه دي ویلي.
