په پنجاب کې د چهارشنبې په ورځ ۲۱۵ د ډینکي نوې پېښې ثبتې شوې دي. د پنجاب د عامې روغتیا وزارت د تازه معلوماتو له مخې، سږ کال د صوبې په ۳۶ ولسوالیو کې د ډینګي ټولټال ۱۰ زره او ۷۵۸ پېښې ثبتې شوې دي.
خو لاهور تر دې دمه د ۴۶۷۵ پېښو ثبتولو سره، تر ټولو مخکې دی. په راولپنډۍ کې ۲۴۱۴، ملتان کې ۱۰۶۹، فیصل اباد کې ۵۱۸ او ګوجرانواله کې بیا ۹۶۹ پېښې ثبتې شوې دي.
په تېرو ۲۴ ساعتونو کې لاهور کې ۱۱۷، راولپنډۍ کې ۳۱، ملتان کې ۹، ګوجرانواله کې ۲۹، فیصل اباد کې ۱۴، شیخوپوره کې ۵ او رحیم یار خان کې دوه پېښې ثبتې شوې دي.
دا مهال د پنجاب په بېلابېلو روغتونونو کې د ډينګي ۱۹۲ ناروغان تر درملنې لاندې دي، چې ۱۰۳ يې د لاهور په سیمهییزو روغتونونو کې بستري دي.
د پنجاب د روغتیا برخې چارواکو له خلکو غوښتنه وکړه، چې د ډينګي تبې د مخنيوي لپاره دې چاپېريال پاک او وچ وساتي.
