د اسراییل او امریکا د استخباراتو مشرانو د قطر له لومړي وزیر سره پر یرغمل شویو خبرې کړي
رویټرز د یوې باخبرې سرچینې په حواله ویلي، چې د سي ای اې او موساد مشرانو په دوحه کې د قطر له لومړي وزیر سره کتلي دي. یوه امریکايي چارواکي د غونډې په تایید سره وویل، چې دوی د حماس له خوا د یرغمل شویو کسانو د خلاصون په اړه خبرې کړي.
دا لیدنه د چهارشنبې په شپه ترسره شوې، د اسراییل د موساد د استخباراتو مشر ډیویډ بارنیا، د امریکا د مرکزي استخباراتو د ادارې مشر ویلیم برنز او د قطر لومړي وزیر شیخ محمد بن عبدالرحمان ال ثاني د حماس له د برمته شویو د خلاصون او د دواړو هېوادونو ترمنځ په غزه کې د حماس او اسراییل شخړو د ختمولو په اړه خبرې کړي دي.
یوې باخبره سرچینې رویټرز خبري اژانس ته ویلي، چې په دې غونډه کې غزې ته د بشري توکو او سون توکو د واردولو د جواز د ورکړې په اړه هم خبرې وشوې، چې اسراییل تر اوسه له دې کاره انکار کړی دی.
قطر چې د حماس د ډېرو سیاسي مشرانو کور دی؛ اوس د یرغمل شویو د خوشې کولو لپاره د حماس او اسراییلي چارواکو ترمنځ منځګړیتوب کوي.
اسراییلي چارواکو ویلي دي، چې د حماس وسله والو پر اسراییل برید کې لږ تر لږه ۲۴۰ تنه یرغمل نیولي دي.
