د غزې د کورنیو چارو وزارت: د جبالیا کمپ روغتون ته څېرمه هوايي برید کې کابو ۱۹ کسان وژل شوي

AP ۱۴۰۲ لړم ۱۸

د غزې د کورنیو چارو وزارت ویلي، چې د چهارشنبې په ورځ د غزې په شمال کې د جبالیا د کډوالو په کمپ کې یوه روغتون ته څېرمه پر یوه کور د اسراییل په هوايي برید کې لږ تر لږه ۱۹ کسان وژل شوي دي.

که دا خبر تایید شي، دا به په یوه اونۍ کې په غزه کې د کډوالو پر تر ټولو لوی کمپ د اسراییل درېیم برید وي.

د اکټوبر په ۳۱مه او د نومبر په لومړۍ نېټه د اسراییل په دوو پخوانیو هوایی بریدونو کې، د غزې د مرکزي ښار په یوه ګڼ مېشته سیمه کې د جبالیا کډوالو کمپ ځینې برخې ویجاړې شوې وې.

د فلسطیني چارواکو په خبره، په دغو بریدونو کې لږ تر لږه ۱۹۵ ولسي خلک وژل شوي دي.

اسراييل ويلي، چې تېره اوونۍ په جباليا کې د ځمکې لاندې په تونلونو د هوايي بريد له امله د حماس دوه جګپوړي قوماندانان او يو شمېر ولسي وګړي وژل شوي دي.

د اسراییل پوځ وايي، د دوی ځواکونو د غزې ښار ته چې د حماس اصلي مرکز دی، پرمختګ کړی دی.

په ورته وخت کې حماس ادعا کوي، چې اسراییلي ځواکونو ته یې درنه مرګ ژوبله اړولې ده.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ