د غزې په تړانګه کې د فلسطیني کډوالو لپاره د ملګرو ملتونو د مرستو او کار ادارې عمومي کمېشنر (انروا) خبر ورکړ، چې د تلې له پنځلسمې نیټې راهیسې د دغې ادارې ۹۹ کارکوونکي په غزه کې وژل شوي دي.
فېلیپ لازارینی په پاریس کې د غزې په اړه په یوې غونډه کې وویل: «تېره میاشت د انروا لپاره یوه دردونکې میاشت وه.»
نوموړي په پاریس کې غزې ته د بشري مرستو په کنفرانس کې اعلان وکړ، چې « په غزه کې زما ۹۹ نارینه او ښځینه همکاران وژل شوي دي او دا په دومره لنډه موده کې په یوه جګړه کې د ملګرو ملتونو د مرستندویه کارکوونکو د وژل کېدو تر ټولو لوړه شمېره ده.»
د غزې د روغتیا وزارت د راپور له مخې، پر غزې د اسراییل د هوايي بریدونو له پیل راهیسې د ۴ زره ۴۱۲ ماشومانو په ګډون لږ تر لږه ۱۰ زره او ۸۱۲ تنه وژل شوي دي.
په غزه کې د فلسطیني کډوالو لپاره د ملګرو ملتونو د مرستې او کار ادارې د کمېشنرۍ په وینا، (انروا) په غزه کې څه باندې ۷۰۰ زره کسان بې ځایه شوي او په غزه کې یې ۱۵۰ ښوونیزو مرکزونو او د انروا ودانیو ته پناه وړې ده.
فېلیپ لازاریني وايي: «یو وخت به په دې ښوونځیو کې ماشومانو ته درس ورکول کېده او خندل به یې؛ خو نن دوی د یوې ډوډۍ او د اوبو د یوه څاڅکي لپاره سوال کوي.»
