ایرانی توکمه ناروېژی د ۲۰۲۲ کال له وژونکو ډزو سره په تړاو په ترهګریز عمل تورن شو
د زنیار متاپور په نوم ایرانی توکمه نارویژی په اوسلو کې د ۲۰۲۲ میلادي کال د ډزو له امله چې دوه کسان پکې ووژل شول، په ترهګریز عمل تورن شو. د هغه محاکمه به په مارچ میاشت کې پیل شي او که مجرم ثابت شي نو د ۳۰ کلونو بند سره به مخ شي. متاپور مخکې له داعش سره خپله وفاداري اعلان کړې وه.
۴۴ کلن زانیار متاپور د ۲۰۲۲ میلادي کال په جون میاشت کې د ډزو له پېښې وروسته، د پېښې په ځای کې ونیول شو او له هغه وخته په بند کې دی. ویل کیږي چې د ښاغلي متاپور محاکمه به شاوخوا دوه میاشتې وخت ونیسي.
نوموړی په دې تورن دی چې پر یوه شپنۍ جشنواره یې چې۵۶۰ کسان پکې راغونډ شوي وو، د شنکوف لس او د توپانچې اته ډزې کړې وې.
نوموړی د ایران کوردی دی، په ۱۹۹۰ لسیزه کې له خپلې کورنۍ سره ناروې ته مهاجر شوی او له دغه برید وړاندې یې له داعش سره خپل بیعت اعلان کړی و.
د څارنوالانو په وينا، په دې قضيه کې څلور نور شکمن کسان هم شامل دي چې د څیړنو د دوام له امله تر اوسه تورن نه دي ګڼل شوي.
ویل کیږي چې دوه شکمن کسان له ناروې څخه بهر دي چې یو یې په پاکستان کې پټ دی او د بل ځای یې نه دی معلوم.
تر دې مخکې په ۲۰۱۱ میلادي کال کې هم په اوتویا ټاپو کې د یوه ښي اړخي افراطي په ډزو کې ۶۹ کسان وژل شوي وو.
