د اسراییل پوځ اعلان کړی، چې له حماس سره یې د جګړې له پیل راهیسې د غزې په تړانګه کې د «ترهګرو ډلو» په څه باندې ۱۵ زره هدفونو بریدونه کړي دي. د اسراییل پوځ ویلي چې، ځواکونو یې د غزې په تړانګه کې د ځمکنیو بریدونو په ترڅ کې شاوخوا شپږ زره وسلې کشف کړې دي.
د اسراییل پوځ د جمعې په ورځ د (لړم په ۱۹مه) په اېکس پانه لیکلي چې، د پوځ ځواکونو د هوا، ځمکې او سمندر څخه د حماس مرکزي دفتر، د توغندیو زېربناوې، د وسلو ډیپوګانې، استخباراتي هدفونه او د حماس د تونلونو په ګډون یې ډېر نور هدفونه په نښه کړي دي.
د غزې په تړانګه کې د حماس تر کنټرول لاندې د روغتیا وزارت ویلي چې، پر غزې تړانګې د اسراییل د بریدونو په پایله کې تر ۱۱ زره زیات کسان وژل شوي دي.
په غزه کې د ملکي تلفاتو زیاتوالی د نړۍوالو او بشري حقونو د سازمانونو له سختو نیوکو سره مخ شوی دی.
له دې سره د اسراییل پوځ ویلي، چې د حماس د «بشپړ له منځه وړلو» لپاره به خپلو بریدونو ته دوام ورکړي.
د حماس وسلهوالو هم په تېره میاشت کې پر اسراییل راکټي بریدونه کړي؛ خو ډېری یې د اسراییل د دفاعي سیسټم لهخوا چې د «اوسپنې گنبد» په نامه یادېږي، شنډ کړای شوي دي.
د اسراییل پوځ ویلي، چې د حماس لهخوا د اسراییل پر لور توغول شوي توغندي شاوخوا ۱۲ سلنه د غزې په تړانگه لګېدلي دي.
د حماس چارواکو بیا په دې اړه څه نه دي ویلي.
