د روغتیا د نړۍوال سازمان مشر وايي، پر غزې د اسراییل بریدونو کې په هرو لسو دقیقو کې یو ماشوم وژل کېږي. ټېډروس اډهانوم د امنیت شورا په ناسته کې زیاته کړه چې، د غزې روغتیایی سیسټم په ګونډو شوی او په ځینو برخو کې ان جراحي عملیاتونه له بې هوښۍ پرته ترسره کېږي.
د روغتیا د نړۍوال سازمان مشر په ټینګار سره وویل:« د غزې په هیڅ ځای کې هیڅوک خوندي نه دي.»
ټیډروس اډهانوم زیاته کړه، چې د اسراییل او حماس ترمنځ د جګړې له پیل راهیسې په غزه کې پر روغتیايي مرکزونو ۲۵۰ او په اسراییل کې ۲۵ بریدونه شوي دي.
د روغتیا د نړۍوال سازمان دغه چارواکي ویلي، چې په غزه کې د ۳۶ روغتونونو او روغتیايي مرکزونو نیمایي یې له فعالیته پاتې دي.
د اسراییل په بریدونو کې د وژل شویو فلسطینیانو شمېر له ۱۱ زرو اوښتی دی.
په غزه کې له ناورین او د یرغمل شویو کسانو د کړکېچ له دوام سره هم مهاله، د ملګرو ملتونو امنیت شورا د اسراییل او حماس ترمنځ د جګړې د بندولو د لارو چارو د څېړلو لپاره بېړنۍ غونډه وکړه.
