د امريکا دفاع وزير لويډ اسټین اعلان وکړ چې د دغه هېواد پوځ په سوريه کې د ایران اسلامي جمهوریت او ورسره د تړلو ډلو دوه مرکزونه په هوايي بريدونو کې په نښه کړي دي. د سوریې د بشري حقونو څار ډله وايي، په دغو بریدونو کې څلورو تنو ته مرګژوبله اوښتې ده وژل.
لویډ اسټین ویلي دي چې دا برید د امریکا د ولسمشر جوبایډن په حکم شوی و.
د نوموړي په وينا، د بريد موخه د ابو کمال ښار ته څېرمه يو تعليمي مرکز او د ميادين ښار ته څېرمه يو خوندي کور و.
د امریکا د دفاع وزیر وویل: «ولسمشر د امریکایي ځواکونو له امنیت څخه لوړ لومړیتوب نه لري.»
هغه ټینګار وکړ: دا اقدام د دې له پاره شوی چې «دا روښانه کړي چې امریکا له ځان، خپلو ځواکونو او ګټو څخه دفاع کوي.»
رویټرز د سیمه ییزو سرچینو په حواله راپور ورکړ چې، یو برید د دیر الزور ښار د ابو کمال په لویدیځ کې په یوه سیمه کې د ایران اسلامي جمهوریت سره د تړلو وسله والو ډلو یو کمپ په نښه کړ.
بل برید د عراق پولې ته څېرمه د میادین ښار ته نږدې پله سره د ایران په حکومت پورې د تړلو ملیشو پر مرکز شوی دی.
دا په دې میاشت کې دریم برید دی چې امریکا هڅه کوي په سوریه او عراق کې د خپلو ځواکونو پروړاندې د ډرون او توغندیو بریدونو ځواب ورکړي چې د اسراییل او حماس تر منځ له جګړې وروسته پیل شوي.
د ایران د حکومت په ملاتړ سره په دې وروستیو اونیو کې د امریکايي ځواکونو او پر متحدینو یې لږ تر لږه ۴۰ځله په عراق او سوریه کې بریدونه شوي چې کابو ۴۵ امریکايي پوځیانو ته دماغي زیان اوښتی او یا هم برسیرن ژوبل شوي دي.
امریکا په سوریه کې ۹۰۰ او په عراق کې ۲۵۰۰ سرتیري لري چې د داعش د بیا راپورته کیدو د مخنیوي لپاره سیمه ییزو ځواکونو ته د پوځي مشورې او مرستې دنده په غاړه لري.
په سوریه کې د اسلامي جمهوریت ډلې پرضد د یکشنبې په ماښام د امریکا بریدونه په داسې حال کې شوي چې د اسراییل او حماس ترمنځ د جګړې د پراخیدو او په سیمه کې د یوې بشپړې جګړې د بدلیدو په اړه اندېښنې د کړکیچ د زیاتیدو له امله دوام لري.
