د ملګرو ملتونو د ماشومانو ملاتړ صندوق وايي، د هرات په زنده جان ولسوالۍ کې یې له ۱۳ زیانمنو روغتیايي مرکزونو سره د مرستې له پاره خیمې او کانټینرونه جوړ کړي دي.
د دغه سازمان په خبره، څه باندې ۴۸ زره کسانو له دغې لارې روغتیايي خدمتونه ترلاسه کړي دي.

په هرات کې تېره میاشت د پرله پسې زورورو زلزلو له امله ۲ زره او ۵۰۰ کسان مړه شوي.
د ملګرو ملتونو د شمېرو له مخې، په دغو زلزلو کې څه باندې درې زره کورونه ویجاړ شوي او شاوخوا دوه زره نور کورونه سخت زیانمن شوي دي.
د هرات ولایت زنده جان ولسوالۍ يوه له هغو سيمو څخه وه چې تېره مياشت د زلزلې له امله په کې تر ټولو زيات زيانونه اوښتي دي.
ملګري ملتونه وايي، تر ۴۳ زره ډېر کسان په مستقیم ډول له دغو زلزلو اغېزمن شوي او په زلزله ځپلو سیمو کې ۱۱۴ زره کسان بشري مرستو ته اړتیا لري.
د دغه سازمان د شمېرو له مخې، د دغو زلزلو ۲۳ سلنه زیانمن کسان له پنځو کلونو کم عمره ماشومان دي.