طالبانو په داسې مهال دغه پرېکړه کړې، چې تېره ورځ یې له پاکستان او ازبکستان سره درې اړخیز سوداګریز تړونونه لاسلیک کړل. طالبانو ویلي، چې له پاکستانه د واردېدونکې چرګانو غوښه حلاله نه ده او مسلمانان یې باید له خوړولو ډډه وکړي.
ځینو طالب چارواکو ویلي، هغه خواړه چې د پاکستان په فارمونو کې چرګانو ته ورکول کېږي د څارویو له خوسا شویو وینو جوړېږي چې دا هم د روغتیا له پاره زیانمن دي او هم د شرعي پلوه حرام دي.
که د طالبانو دغه پرېکړه عملي کېږي؛ نو ورسره د پاکستان د چرګانو د روزلو صنعت سخت زیانمنېږي، ځګه د پاکستاني چرګانو له پاره افغانستان ستر او ګټور مارکېټ بلل کېږي.
تر دې وړاندې د جمهوریت پر مهال هم د افغانستان حکومت د پاکستان څخه د چرګانو په واردولو بندیز لګولی و؛ خو هغه مهال په کور دننه د چرګانو د فارمونو خاوندانو شکایت لاره، چې ګواکې پاکستاني فارم لرونکي غواړي په مارکېټ کې د افغان فارمونو بازارونو سره نا سالمه سیالي وکړي.
خو ښايي دا پلا خبره بل ډول وي، په پاکستان کې ځینې کتونکي دې مسلې ته سیاسي رنګ ورکوي او وايي چې د دې کار اصلي لامل له پاکستانه د افغان کډوالو د اېستلو وروستۍ پرېکړې سره تړاو لري.
